Parlamentario Mc William kier sa kon responsabel ta pa skolnan avansá habri dia 5 di yanüari pa tur mucha?

Resientemente Minister enkargá ku Enseñansa sr. Steven Croes a anunsiá ku skolnan avansá por eliminá e asina cohort i lèsnan digital pa skolnan avansá ya ku pa djamars tur e muchanan mester ta na skol normal, esaki despues di a konsulta ku direktivanan di skol. Segun Frakshon di MAN ta importante pa nos tur por kontinuá ku nos bida den e nòrmal nobo mas lihé ku ta posibel pero nos mester ta hopi kouteloso ku e paso aki. Esaki tumando na kuenta ku ta tin dos fiesta den fin di aña unda ya kaba na otro paisnan di mundu sifranan a kuminsá subi pa ku e kasonan di COVID19 despues di e dianan di fiesta. Na Kòrsou ainda nos ta mirando un bahada den e sifranan pa loke ta trata kasonan positivo. Pero sin tene kuenta ku e último dianan di fiesta dia 31 desèmber /1 yanüari lo tabata rekomendabel pa warda e 10 dia despues di e fechanan pa asina haña un bista kon e vírùs por a desaroyá su mes. Ta konosí ku personanan di edat mas yòn ku ta keda kontagiá su simtomanan ta minimal. Pero ta mesun un personanan di edat mas yòn aki ta na kas den kontakto ku mayornan, welanan ku si por risibí kehonan drástiko na momento ku nan keda kontagiá ku e vírùs aki. Mirando e posibel desaroyonan aki segun Frakshon di MAN lo tabata ideal pa opservá kon e vírùs aki ta desaroyá e dos siman aki benidero aki promé ku a tuma e desishon di laga skolnan avansá kuminsá risibí lès bek di forma físiko.

Den kuadro di esaki sra Mc William a hasi Minister enkargá ku Enseñansa e siguiente preguntanan:

1. Tin un Protokòl pa tur skol avansá di kual nan mester tene nan mes na dje na momento ku skolnan habri bèk ?
2. Ken ta enkargá pa kontrolá e protokòl si esaki ta keda ehekutá?
3. Kon ta bai mantené e distansia sosial den klasnan?
4. Kon ta bai regulá e distansia  den pauze di e muchanan?
5. Mondkapje ta bai ta obligatorio na skolnan avansá pa muchanan tantu komo dosentenan?
6. A envolví plataforma di mayornan den e tuma di desishon aki.
7. E echo ku ta bai kuminsá ku skol normal bèk ta nifiká ku no lo bai hasi un investigashon di kiko ta efektonan di duna lès digital e último lunanan pa e muchanan,dosentenan i mayornan?