Lider di fraccion di AVP, Marlon Sneek a toca e tema di refineria CITGO mustrando cu despues di a duna oficina di Papa ordo pa atende finalisacion di e contrato cu e compania Mericano pa asina cera esaki, gobierno a bin dilanti y presente diferente scenario bunita na pueblo.
“Entre otro gobierno a bin gaba cu na oficina di notario mas cu 80 hende a inscribi y cu e interes ta grandi pa lease tankinan y awor di repente por scucha cu e compania cu a gana e bidding, lo core cune ya cu e grupo aki no tin placa.
Anto e ora gobierno tin cu bin dilanti y splica pueblo ta con a haci e cos aki. Gobierno splica con a hinca e cos aki den otro.
Di con gobierno tabata gaba cu tabatin mas cu 86 interesado y awe esun cu tabata miho den ofertanan duna, no tin placa, kierman ta tuma gobierno ta tuma pueblo haci y kico ta pasando?
Fraccion di AVP a haci pregunta caba riba kico a bay ta e siguiente proceso of accion di gobierno, caminda e otronan cu a duna un oferta caba, lo ta e prome nan cu ta bin na remarke pa por haya un oportunidad, of ta bay tin un bidding nobo of gobierno ta bay saca un coneu for di den su sombre y nombra un hende pa bay maneha e transshipment aki.
Akinan tambe nos ta cu wowonan habri, cu oreanan habri pa asina nos keda informa comunidad di tur bagamunderianan cu a bin ta tumando luga y sigur caminhda cu por fraccion di AVP lo percura pa para esakinan ya cu nos no por sigui den un pais, caminda cu tin un gobierno cu ta burachi di poder, no a respeta ningun ley y ta haci locual cu nan kier,” Marlon Sneek, lider di fraccion di AVP a declara.