ORANJESTAD, Aruba
Tur hende por corda cu na luna di december di 2017, gabinete Wever Croes a introduci un belasting nobo, cual a haya e nomber di BAVP cu ta para pa “Belasting Aditionele Voorzieningen PPS projecten.”
Lider di fraccion di AVP, sr Marlon Sneek a sigui mustra cu e belasting nobo aki, a bira un ‘bestemmings heffing’ y ora cu paga esaki, mescos cu ta e caso cu e belasting di BAZV, e placa ey tin cu bay pa AZV pa cubri gastonan di cuido medico.
Sr Sneek a sigui mustra cu gobierno a introduci e ‘Belasting Aditionele Voorzieningen PPS Projecten’ cu ta un belasting special pa paga loke ta e proyectonan di PPP directamente.
“Sinembargo mientras cu gobierno ta yama reunion pa hunga wega di gañamento atrobe cu pueblo, tratando di purba convence pueblo cu medidanan nobo na caminda ta pa motibo di debe cu gobierno di AVP lo a crea, e gañamento aki ta resulta cu falta di respet total pa pueblo.
Aki nos tin un gobierno, caminda Prome Minister Evelyn Wever Croes na tur momento cu por, ta papia di integridad, ta papia di transparencia pero ta haci net lo contrario y gaña pueblo manera cu nan a haci caba pa dos aña largo, tin cu caba y no por sigui manera nan ta purbando pa haci.
Cifranan oficial ta mustra cu e belasting di BAVP introduci pa gabinete Wever Croes, a produci 106 miyon florin pa caha di gobierno na 2019.
Na mes momento por a scucha e mesun Minister di Finansa declara algun dia atras cu e proyectonan di PPP tanto esunnan di gobierno di AVP y esunnan di gobierno di MEP, lo costa pa 2019 e suma di 80 miyon florin.
Gabinete Wever Croes a pone pueblo paga pa e proyectonan aki e suma di 106 miyon florin cu ta cifranan cu nos a ricibi diabierna ultimo y cu ta den e ultimo kwartaal rapportage di 2019 y loke Minister tin cu bin splica pueblo awo, ta unda e 26 miyon florin cu a sobra a bay?
Minister mester bin splica pueblo na unda e resto di placa a keda , ya cu e ta un ‘bestemmingheffing’ y gobierno no por coy e placa aki pa gaste cu otro cos ya cu a bin Parlamento pa pasa un ley pa buta ‘Belasting Aditionele Voorzieningen PPS Projecten’ y am bisa pueblo cu bo ta bin c’un medida pasobra mester paga proyectonan cu e gobierno anterior a laga atras.
Awe ta coy e placa y gasta esaki otro caminda y awor gabinete Wever Croes kier bin cobra pueblo un biaha mas cu mesun recibo, loke ta mesun cos cu gobierno ta bende un rifa y ora cu esaki caba di hunga, e bolbe cobra e mesun rifa aki.
E cos ey no por, ya cu gobierno a bin c’un belasting pa paga loke ta e proyectonan di PPP, pues pone e placa ey pa loke tin cu paga y stop cu e adiccion cu gabinete Wever Croes tin di gasta placa y gasta mas placa cu ‘friends & family.’
Awe nos por mira cu e gobierno aki, en comparacion cu e gobierno anterior, tin un gasto adicional di riba 130 miyon florin y eynan ta caminda mester bay, eynan gobierno tin cu bay corta y no bin belasting nobo, ya cu manera tur hende sa, tin un set di medida na caminda y ta pesey e reunion di siman pasa a wordo yama, pa trata di bruha tera pa pueblo kere cu pa motibo di AVP, pueblo ta haya mas medida.
Esaki no por, gabinete Wever Croes ta cobrando pueblo caba e belasting BAVP, caminda gobierno a haya 106 miyon florin na 2019, pues tin placa te cu ta resta pa paga e proyectonan aki y awor kier crea e impresion cu tin un desaster y otro excusanan barata, pa hustifica mas medida cu ta placa cu lo bay pa cumpli cu sponsor y sostenedonan di partido,” Parlamentario marlon Sneek a splica.
