ORANJESTAD,Aruba
For di prome dia den gobernacion, pueblo di Aruba a conoce cu el a haya un gobierno di MEPPORRED cu no ta sincero cu su promesanan haci durante di campana electoral.
Lider di fraccion Marlon Sneek a mustra diasabra ultimo den e programa radial di Partido AVP, cu for di salida di e actual gobierno, pueblo a ripara cu promesanan cu politiconan di e actual gobierno a sigura na pueblo cu nan lo bay haci, nunca a wordo haci.
Den e programa radial hunto cu colega di partido y di Parlamento, Mike de Meza, e lider di fraccion di AVP a menciona e desaroyo cu pueblo completo a pasa aden, caminda practicamente e poder di compra a yega te na cero na e momentonan aki.
“Gabinete Wever Croes for di su salida a confirma cu e no tin un plan, e no tin un vision pa duna pueblo loke a wordo priminti durante di campaña, caminda un serie di puntonan cu a priminti pueblo cu nan lo haci of cambia, no a wordo haci y nunca cambia.
Nan a bisa cu nan lo baha edad di pensioen, nunca el a wordo haci. Nan lo haci scol por nada pero te awe ainda esey no a sosode. Nan lo a kita Aruparking y te awe ainda esaki a tuma luga.
Cu firmesa a wordo sigura na pueblo cu gabinete Wever Croes lo baha prijs di awa y coriente na mita, tampoco te dia di awe a tuma luga, pues un lista largo di promesa haci na pueblo cu nunca a wordo cumpli.
Esaki no ta opinion di Marlon Sneek pero si esunnan cu kier subi e webpage di partido MEP, nan lo haya tur e puntonan di promesa aki cu a wordo haci na pueblo y lo ripara cu no a cumpli cu ningun.
Pa colmo no ta solamente cuestion cu nan no ta haciendo loke nan a priminti, pero nan a crea un situacion pio ya cu pueblo a conoce un adelanto despues di gabinete Mike Eman I y II pa loke ta su poder di compra y awe e poder di compra aki di pueblo ta para na cero.
Prome cu e crisis actual di covid-19, ya caba pueblo tabata pasando den un crisis grandi na man di gabinete Wever Croes cu a introduci asina hopi medida contra pueblo, cu practicamente faminan no tabata logra ‘come around’ cu loke ta resta den nan cartera tur fin di luna.
Esaki ta un punto cu pa hopi tempo caba fraccion di AVP a bin ta mustra cu medidanan cu gobierno a introduci contra pueblo, tin di haber solamente pa cubri gastonan grandi nobo y tur hende por bay riba webpae di CAFT caminda e informacion aki ta poni.
E rapport di CAFT for di presupuesto 2018 a informa gabinete Wever Croes cu nan a subi gastonan cu 100 miyon florin, cual ta su prome salida como gobierno y asina ela sigui subi consecutivamente e siguiente añanan.
Gastonan cu no tabata relacion cu proyectonan pa pueblo, yudanda financiero pa pueblo of inversion den un of otro adelanto pa pueblo, pero tur esaki pa cumpli cu friends and family y tambe sponsornan.
Un maneho asina malo caminda practicamente por bisa cu gabinete Wever Croes na e momentonan aki, tin pueblo na rudia pa un maneho sin pia ni cabes cu a wordo hiba y cu ainda ta wordo hiba.
Den e situacion actual di e crisis cu a surgi, por mira cu gabinete Wever Croes despues di algun siman di a declara e pais oficialnan covid free, por mira cu ainda gobierno ta haciendo mal uso di e ley di calamidad y ta sigui presiona pueblo caminda luganan tin cu cera tempra, pueblo tin cu para den rey manera un drive thru pa busca number na CIAD.
For di momento cu paga number di auto tin cu mustra seguro di e auto pues ta djis entrega e plachi na su doño pero gobierno ta sigui presiona pueblo y esaki ta inaceptabel.
A declara oficialmente cu Aruba ta covid free, no tin ningun hende ta drentando, pues laga e luganan habri, laga e hendenan reanuda nan bida normal pa e economia local tambe cu minsa move pero simplemente e incapacidad pa falta di un vision, pa falta di conocemento pero mas cu tur cos, e incapacidad increibel di e gobierno aki, tin e pais den un crisis emocional y financiero, caminda gobierno ta sigui sconde tras di e covid-19 pa tene pueblo domina,” lider di fraccion Marlon Sneek a declara.
