E tarifa di awa y coriente a subi caba na Corsou for di prome di Mei 2022!
For di aña pasa e prijs di e bari di petroleo a cuminsa subi. Na Februari e guera entre Rusia y Ukraina a cuminsa y a impulsa e prijs di crudo mas halto ainda. Na December 2021 petroleo a cuminsa baha di prijs y pa e motibo aki WEB su expertonan a conseha gobierno pa no hedge ainda. Conseheronan semper ta observa y analisa e tendencia di e prijs cu tabata bahando y a pensa cu esaki lo baha mas ainda. Sinembargo despues di e consehonan aki por a ripara cu e prijs di e bari di petroleo a haci net lo contrario; e la cuminsa subi. Durante di e lunanan cu a pasa, WEB Aruba NV a cuminsa absorba e aumento den e prijs aki, sinembargo e compania ta considera cu nan a yega un punto cu esaki no ta sostenibel mas. Pesey a manda yama WEB Aruba NV pa bin Parlamento di Aruba algun siman pasa y splica esaki pa medio di un presentacion y cu cifranan alcaso. Mester remarca cu prijs di awa y coriente a subi na nos hermana isla Corsou for di mei 2022 caba.
Kico e consumidor por haci pa por acapara cu e tarifanan nobo?
Enbista cu lo aumenta e tarifanan temporalmente, pa via di e aumento di e prijs di petroleo, e consumidor por ahusta e forma con e ta haci uso di awa y coriente.
Con nos por spaar awa?
- No laga e kraanchi awa habri ora di skeiro djente, ora ta habonando of laba cabey ora di baña.
- Muha mata ora solo ta bahando. Asina menos awa ta bai perdi.
- Ora di laba auto, usa un hemchi cu awa y habon pa hawa e auto.
- Ora di laba coi kibra, yena e baki cu awa y habon pa laba y despues yen’e cu awa pa hawa tur cos.
Con nos por spaar coriente?
- No laga fan of otro aparatonan di coriente cendi sin tin mester.
- Paga tur luz trempan y paga luznan den camber of baño cu no ta wordo usa.
- Limita e uso di airco. Por pone airconan na timer pa asina por controla e oranan cu ta haci uso di esaki.
- Pone e airco na un temperatura di maximo 22 °C. Mas abou e temperatura ta, mas coriente lo gasta.
- Laba paña riba cierto dia(nan) so. Controla y usa e midi di awa cu mester pa e cantidad di paña.
Manera tur otro pais rond mundo, Aruba tambe a hay’e cu aumento di awa y coriente. Laga cada un di nos ta mas consciente di e uso di esakinan, pa asina nos por controla e gastonan cu e tarifa aumenta ta trece cu ne.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!