Parlamentario Marco Berlis (MEP): Si bo no ta opina manera Miguel Mansur, bo no tin derecho di opina

Mansur violando derecho constitucional di lidernan cristian usando calumnia y un actitud anti democratico 

Awe mi ta continua cu e analisis di e articulo di Miguel Mansur y su actitud arogante y anti-democratico cu sigur pa nos, no ta un sorpresa. Mansur a opta pa calumnia y gaña pueblo den un articulo den prensa, cu ta demostra su ignorancia con democracia y nos constitucion ta funciona. Ademas e ta procede pa descrimina abiertamente stranheronan di un forma dictatorial y baho. Awe mi ta continua pa desenmascara Mansur, cu no ta considera ni balora nos cultura, tradicion y balornan. Ban sigui analisa su mentiranan;

1. Mansur: Organisacionan religioso mester cuminsa paga belasting. E pagado di belasting Arubano cu ta contribui mas cu 1 miyon florin pa aña na subsidio pa e misanan mester haya escogencia si su placa ta bay pa misanan of no. Prome cu tur cos; Solamente misanan Catolico y Protestant ta hayando e subsidio aki. Cu e poniencia aki e ta ataca nan directamente y kier kita tur sosten y subsidio na e institucionan aki. Un poniencia barbaro. Si bo no ta opina manera Miguel, raspa kita subsidio, y lubidando kico tur e Iglesia Catolico y Protestant a haci y ta hacienda pa Aruba. Acaso Miguel a lubida cu gran mayoria di scol a wordo estableci pa iglesia Catolico? Cu hopi instancia social y ayudo social y mental a wordo funda of apoya pa esakinan? Ainda Iglesia Cristian engeneral ta aporta na esakinan! Ademas, NIUN iglesia Cristian di otro denominacion ta haya placa di gobierno. Manera tur otro stichting, cualkier persona cu ta haya un salario den un Iglesia ta paga su belastingnan respectivo! Miguel busca informacion prome cu bo papia pasobra bo ta mustra hopi ignorante! Asina Miguel kier bende un storia di rabia, esesperacion y panico pasobra e no gusta pa bo contradicie! 

1. Mansur: Gruponan religioso cu kier eherce poder politico tin tur derecho pa forma un partido y gana eleccion y despues habri nan boca. Imagina bo e arogancia cu Miguel ta papia aki! Pasobra lidernan Cristian a expresa nan mes e ta ofendi y awor kier silencia nan derecho constitucional! Segun Miguel bo mester ta parti di un partido politico, gana un eleccion, pa bo MAG habri bo boca. Den otro palabra, si bo no ta den partido politico cu a gana un asiento of mas bo MESTER keda keto! Parce Mansur ta lubida KENDE e ta representa, y kende a pone den e stoel! PUEBLO ta bo hefe! Pueblo! Anto abo Mansur kier bisa pueblo cera bo boca y keda keto?? Bo actitud y postura anti-democratico y dictatorial bo kier bin impone riba pueblo? Abo ta bisa bo hefe kico e mester haci? Ay Miguel bo ALTIVES Y bobedad ta bo caida!

Cu e analisis aki ta keda bon prueba, cu Mansur no ta respeta nos constitucion, ta dispuesto pa gaña, manipula y descredita hendenan honesto cu ta sirbi pueblo, djis pasobra nan no ta sostene su ley di matrimonio di mesun sexo. Mansur den su mesun palabranan ta descrimina nos ciudadanonan stranhero abiertamente pa via di nan creencia y fe y ta haya cu tur di nan mester wordo declara persona non-grata, kita nan permiso di estadia y deportanan inmediatamente! Sr.Mansur no ta honra libertad di expression pa niun hende cu ta contradicie. Mi mester bisa mas? No, Mansur den su articulo ta condena su mes cu su ignorancia y actitud dictatorial.

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!