Mirando cu pueblo tin asina hopi pregunta, cuestionamento y preocupacion cu e situacion di construccion di hotelnan, mi a manda algun pregunta pa minister encarga cu infrastructura, Minister President mr. Evelyn Wever-Croes. E preocupacion di pueblo ta na su lugar y e mensahe cu mi ta capta riba e medionan social ta cu tin falta di informacion y claridad den pueblo pa cu e tema. E insinceridad politiconan den oposicion no ta yuda pueblo tampoco pa compronde e situacion actual y kico realmente y kico a wordo haci caba pa minimalisa e construccionan di hotelnan.
Permisonan duna ta data di e gobierno di AVP 2009-2017.
E realidad ta cu a duna basta hotel pa construi un cantidad di mas o menos dies mil camber durante di e gobierno catastrofico di AVP. Esaki tambe hopi hende sa, pero cu algun hende y AVP mes kier sconde. Dicon? Pasobra nan sa e consecuencianan di esaki. Ya e tempo ey tabata tin peticion di pueblo pa stop di traha mas hotel, pero esaki no a wordo scucha. Mirando cu esaki ta un tema importante pa pueblo mi a haci minister president e siguiente preguntanan:
- Minister por informa Parlamento cuanto tereno pa hotel a wordo otorga desde 2009-2023?
- Minister por informa nos cual tabata e ministernan cu a firma y entrega e terenonan aki pa e hotelnan en cuestion?
- Minister por a informa Parlamento cuanto camber di hotel a wordo entrega permiso y entrega tereno pe entre 2009-2023?
- Minister por a resumi cuanto hotel y camber gabinete Wever-Croes-I y II a logra cancela den su esfuerso pa minimalisa e cantidad di hotel y camber adicional na nos país entre 2017-2023?
- Minister por menciona e nombernan di hotelnan cu a logra wordo cancela pa e gobierno actual?
- Minister, cuanto contract di hotel y camber keto bai tin permiso pa wordo construi sin cu esakinan a cuminsa ainda cu e construcción? Por menciona cuanto camber nos ta papiando di dje akinan?
- Minister, cuanto lo costa país Aruba pa cancela un di e contractnan di hotel ainda?
- Minister, nos tur ta di acuerdo cu nos no kier mas hotel y cu Aruba tin suficiente. Cual ta Minister President su opinion riba esaki?
- Minister, con bo ta wak Miguel Mansur su iniciativa pa “benta hotel abao?”
- Minister ki consecuencia e lo tin pa país Aruba si ta cuminsa cancela erfpacht di hotelnan cu kier renoba/extende e duración di esaki?
- Minister, ki consecuencianan lo tin si inversionistanan lo tende cu Aruba ta cuminsa tumba hotelnan abao?
Den e maneho nobo di gobierno nos a wordo informa cu gobierno lo tuma un maximo di tres siman pa contesta e preguntanan di cualkier parlamentario. Manera cu mi ricibi e contestacion di minister president mi lo comparti esaki cu pueblo pa asina pueblo por tin claridad y informacion concreto riba e tema di “no more hotels.”
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!
