Diamars 21 di Februari abogado di Benito Sevinger, sr. David Kock, a anuncia cu sentencia di caso Avestruz lo ta riba 14 di April benidero. Esaki no ta bin como sorpresa ya cu Hues di e caso a bisa cu probablemente e lo dicta sentencia den e prome cuartal di 2023. Cu esaki e caso mas grandi den historia di Aruba di soborno, estafa di pais Aruba, abuso di funcion, labamento di placa y malversacion, lo conoce su prome veredicto. No ta desconoci cu Benny a bisa cu esaki ta un persecucion politico y cu e lo bringa su caso te den cassatie mescos cu Paul. Ministerio Publico a exigi pa Benny wordo kita di e passief kiesrecht pa un tempo di 10 aña. Tambe un total di 914.651.72 florin lo mester wordo kita for di dje y a exigi 5 aña di prison pa Benny. Sigur e anuncio aki ta trece presion y panico den e seno di AVP.
Reaccion di AVP
Esaki no ta algo facil pa Partido AVP cu pa hopi tempo a tapa, brasa y aproba corupcion. Hamas un grito di condena y distanciamento a tuma lugar den nan seno di esnan cu a abusa y causa corupcion cu patrimonio y placa di pais Aruba. Politicamente nan ta muisstil, sin opinion y ta trata na desvia atencion den cualkier otro sombra cu nan por haya pa sconde aden. Mientras ta grita di e “bon comun” den cada bario loke nos por a bin ta mira cu tin un “silencio y tapamento comun” riba e casonan cu ta treciendo berguensa enorme riba nos nacion.
Reaccion di Miguel Mansur
Otro persona cu ta keto relaciona cu e corupcion cu ta reina den e signatura berde ta Mansur. No ta desconoci cu tin un sospechoso den e caso Avestruz di fam Mansur. E familiar aki a haya miyones den e organizacion criminal di Sevinger segun e requisitoire. Miguel tambe lo mantene silencio riba e caso despues di April 14? E lo condena e caso y esnan involvi? Mansur lo tin e curashi pa kibra silencio riba un caso den cual un di su familiarnan ta wordo menciona como sospechoso? Mansur ta un tiger cu of sin djente ora ta trata e caso IBIS y Avestruz? Tempo lo sa di mustra pueblo e colornan berdadero di Mansur.
Kico ta bay sucede April 14 venidero ta Hues so sa awo. No ta pornada cu Mike “Bon Comun” Eman ta silencioso y perdi foi bista e simannan aki. Kico e lo tin di bisa awor cu sentencia final a cay den caso IBIS? Ainda Mike lo sigui tapa e abuso aki? E politiconan nobo a bisa di lo duna opinion ora cu sentencia final di IBIS lo cay y ora sentencia lo cay den prome instancia di Avestruz. Unda nan a keda nos no sa, pero ohala nan lo tin e curashi pa vocifera na fabor di pais Aruba. Ohala nan lo tribi pa vocifera cu e mesun intensidad e corupcion di tur y no solamente di esnan cu ta cumbini nan. Ohala nan por representa e opinion y na defensa di pueblo y no solamente di un partido. Un partido den panico, un partido den desesperacion y silencio no comun.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!
