Un di e metanan pa cual mi a drenta politica ta pa fortifica y aporta na e structura di control di Parlamento y Gobierno. Aña pasa 2021 nos a logra pasa e Ley di Screening pa Ministers, cual ley ta hopi mas rigoroso cu e ley di screening di antes. Sinembargo ora nos wak e leynan cu mester protege e integridad y transparencia di Parlamento, esaki tin varios “buraco” ainda cu awe ta causa daño serio na nos pais y imagen di nos organo di mas halto.
Naturalmente e caso di Benny Sevinger a habri wowo di pueblo y hopi hende ta cuestiona con por ta posibel cu un sospechoso por wordo eligi y por sinta ainda den nos Parlamento. Esaki ta causando un daño enorme na nos imagen internacional, esta cerca otro paisnan cu ta nos aliadonan. Esaki sigur no ta loke nos kier pa Aruba ta conoci pe. Ta pa e motibo aki tambe mi a cuminsa cu un iniciativa nobo pa forma un “bijzondere commissie” den Parlamento, pa conhuntamente cu coleganan cambia leynan, brainstorm y discuti cual ta e mihor forma di proceder pa hinca e ley di integridad pa Parlamento den otro.
Aunke e lucha pa intergridad y transparencia den Parlamento mester ta e lucha di cada Parlamentario, esaki no ta e caso di oposicion. No tin ningun iniciativa, plan ni intencion di fraccionan di oposicion pa uni na e lucha pa integridad den Parlamento ni pa resolve e caso aki cu ta haciendo daño na nos credibilidad den pueblo. Estadisticanan di e rapport di CBA, “Rapport Encuesta Corupcion 2020,” ta mustra cu 71% di nos pueblo no ta confia politiconan. Sigur ora nos ta wak e postura di coleganan den oposicion, esaki ta alimenta e pensamento y sentimento di desconfiansa cu ta reina den pueblo. E rapport di CBA riba pagina 5 ta sigui bisa; “Pueblo ta pensa cu politiconan no tin e boluntad real pa bringa corupcion, pasobra probablemente nan por ta beneficiando di esaki.”
Ora nos a wordo huramenta como parlamentarionan di pais Aruba, nos a promete of huramenta cu nos lo sirbi pueblo cu “eer en geweten,” esta, cu “honor y consenshi.” Lamentablemente mirando e casonan multiple di corupcion den AVP, sospechosonan sinta den Parlamento, e gañamento y manipulacion constatemente di oposicion den prensa y e cero interes di oposicion pa produci iniciativanan real pa sigura integridad den Parlamento, ta demostra cu nan no tin ni “eer” ni “geweten mas!” Un situacion lamentabel, pero cu alaves ta un motivacion pa mi traha duro pa caba di establece e comision special di Integridad pa Parlamento y cuminsa pone presion pa garantisa cu nos Parlamento por ta integro atrobe den futuro!
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!