Hulanda kier dicta kico Parlamento di Aruba mester haci!
Recientemente Parlamento di Aruba a aproba e ley di LNT. Inmediatamente gobierno di Hulanda a laga sa cu gobierno di Aruba a kibra e acuerdo cu nan tabata tin riba e ley di LNT, pasobra Parlamento di Aruba a dicidi di uza su autoridad legislativo pa traha un amienda, cu tabata contene cambionan minimal, sinembargo importante, den e ley aki. Un di e cambionan ta amplia e tempo di transicion stipula den e ley, di 2 pa 5 aña. Esaki ta necesario pa duna e experto un chens pa ahusta su finansas cu e realidad di un salario reduci substancialmente. Ademas e ta evita casonan den corte pasobra dos aña di transicion ta un tempo demasiado cortico pa e cambio salarial aki.
E realidad tambe ta cu na Hulanda tin e mesun ley aki, cu ta wordo yama WNT of balkenendenorm cu a drenta na vigor 1 januari 2013. E WNT si ta duna expertonan Hulandes 7 aña di transicion. Pesey mi a haya cu ta sumamente inhusto di parti di Gobierno di Hulanda, cu awor kier bin impone un tempo di transicion di apenas dos aña pa nos expertonan na Aruba, loke den mi parecer ta totalmente inacceptabel. E forma aki di bin impone y demanda sin tene cuenta cu hende y problemanan huridico no ta cuadra cu maneho responsabel y etico.
Ademas di esaki, Hulanda kier forsa gobierno pa bisa Parlamento di Aruba kico pa haci, y asina forsa Parlamento di Aruba bai na amen di Hulanda. Esaki ta bay contra tur ley y etica di democracia y sigur ta un actitud colonial y inacceptabel. Nos ta un estado di derecho y Parlamento di Aruba ta e organo di mas halto di nos pais y ta independiente. Esaki ta significa cu ora gobierno di Hulanda ta cera un conbenio cu Hulanda, esaki ta sucede na nivel di gobierno y no ta inclui Parlamento. Acaso Tweede Kamer na Hulanda ta haci segun gobierno Hulandes ta manda? Gobierno di Aruba a cumpli dor di pasa e ley di LNT den Parlamento, sinembargo ta Parlamento ta dicidi con e ta trata y ahusta e ley aki. Esey ta e poder di Parlamento, cu ta e poder legislativo aki na Aruba.
Hulanda mester sa y sa masha bon, cu prome cu pandemia Aruba tabata bayendo riba bon caminda. Pandemia a pone nos na rudia. Awor ta parce cu Hulanda kier mantene nos riba rudia enbes di brinda e apoyo necesario pa yuda nos pais recupera y nos economia crece atrobe. Aruba semper a lucha y a logra, y nos lo logra un biaha mas pasobra e pueblo di Aruba ta decidido di vence cualkier obstaculo cu ta den su caminda pa sigui progresa y sigura e bienestar pa nos futuro generacionnan.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!