Parlamentario Marco Berlis (MEP): Gerlien Croes y su double standard

Gerlien ta exigi un reunion publico riba Eddie Briesen pero ta muisstil riba Benny Sevinger

Algun dia pasa mi a tuma nota di un conferencia di prensa di mi colega sra. Gerlien Croes. Den e rueda aki sra. Croes ta exigi un reunion publico pa trata e investigacion cu ta encera sr. Eddie Briesen, den e caso cu yama Kwihi. E stunt politico aki sra. Croes kier hunga mientras e investigacion apenas a cuminsa, ya cu ora ta haci inval ta pa OM acumula material pa nan por haya evidencianan pa e caso. Awor e hipocresia di sra. Gerlien Croes ta obvio, ya cu el a wordo puntra masha hopi biaha den pasado tocante di su opinion den e caso IBIS y Avestruz, pero nunca e tabata tin e curashi di contesta. Finalmente, no mucho tempo pasa el a laga sa den Parlamento, cu ora e veredictonan cay den e casonan aki, e lo sali vocifera su opinion. Ainda nos ta wardando pa su opinion y declaracion den caso IBIS, ya cu pueblo sa cu diamars mainta 21 februari 2023 sr. Paul Croes a entrega su mes pa wordo cera den KIA. Adicionalmente, a sali diamars mainta pa via di comunicado cu e veredicto di caso Avestruz lo keda cla pa April 14, 2023.

Siguramente pueblo henter por a wak e “double standard” cu sra. Croes ta opera den dje. Muisstil riba casonan historicamente bergonsoso pa henter Pais Aruba, den cual miyones a wordo regala y malversa, y Gerlien a keda keto keto y no kier duna un opinion riba dje. Pero riba un investigacion nobo di Kwihi e ta exigi un reunion publico inmediatamente! E tipo di actitud aki di sra. Gerlien Croes ta evidente y ta confirma cu e ta tapa y brasa e corupcion di su propio partido, y no tin weso di lomba pa denuncia e fraude y abuso di poder cu e sospechosonan den su mesun seno a comete, pero awor kier hunga politica cu un caso nobo. Pesey e pregunta clave pa Gerlien ta: Dicon bo no a pidi un reunion publico pa trata caso IBIS of Avestruz? Bo ta contra corupcion, pero selectivamente, pasobra e no por ta di bo mesun partido AVP? Kiermen hamas bo ta bay denuncia e desastre, ladronicia, fraude, abuso di poder y corupcion di bo mesun partido? Bo sa si cu pa prome biaha den historia un politico aki na Aruba a wordo cera cu un sentencia asina largo y e ta den bo partido? Gerlien ta lucha pa integridad y pa pueblo, pero ta aproba y ta muisstil riba corupcion den su propio seno y memey di su propio colega y amigonan? Esey nos ta yama ‘e double standard comun’ cu boso ta propaganda den AVP.

Ademas bo silencio ta mustra bo debilidad y bo parcialidad, cu partidismo berde ta bo prioridad y no e interes comun di pais Aruba. Esaki ta e bon comun cu boso ta papia di dje? Mientras por cuestiona MEP, cada un di nos a papia y lo sigui papia abiertamente di tur caso y tur investigacion, incluyendo esunnan di nos sra. Gerlien. Nos lo denuncia esakinan sin importa di cual color e ta! E ta bergonsoso, si e ta berde, geel, blauw of cualkier color. Bergonsoso paso bo no ta mancha un partido pero un pais, dañando e confiansa cu pueblo mester tin den politiconan! Hamas e cosnan aki mag di bolbe sucede! Pero pa esnan cu ta persisti di haci malo y kier enrikese nan mes riba custiya di pueblo esaki ta un mensahe cla y raspa na bo: Un Ministerio Publico empodera lo sigui actua cu man riguroso y fuerte contra tur esnan cu ta abusa di nos pais Aruba, y hamas niun di nos lo tolera esaki! Asina ta sra. Gerlien Croes, madura y siña para na e defensa di e pueblo cu nos ta representa, y no solamente e partido di “double standard” comun cu abo ta profila bo mes riba dje! 

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!