AVP su bon comun ta gaña pueblo pa ganashi politico
Algun luna pasa Minister Dangui Oduber a anuncia den conferencia, cu gobierno no lo continua cu Eigen Bijdrage mas. E decision aki a wordo tuma pasobra CAFT no kier permiti AZV bin cu un vangnet social cu por protege esnan mas vulnerabel den nos sociedad. Asina tambe minister Dangui Oduber hunto cu su ekipo a lora manga y a produci un alternativa cu awor ta produci e mesun entradanan pa AZV enbes di Eigen Bijdrage.
AVP gañando pueblo
E ta keda lamentabel sinembargo, cu fraccion di AVP ta keda gaña den nan desesperacion cu AZV lo introduci eigen bijdrage pa remedi. Esaki simplemente no ta berdad. Nos ta compronde nan panico: “Caso Avestruz” ta den full swing, caso Ibis lo tin un sentencia final pronto, CAFT a declara cu e postura di oposicion contra presupuesto 2023 ta un locura y cu no mester bin un conseho nobo. DWJZ a refuta oposicion su mentira, cu mester a bin cu conseho di Raad van Advies nobo. Gañando di e forma baho aki e pregunta ta keda: Esaki ta e “bon comun cu AVP pro corupcion ta papiando di dje?” Ora cu bo ta malinforma pueblo pa ganashi politico, esaki ta beneficia e “bon comun?” Ora cu bo ta sembra simiyanan di duda y miedo den nos pueblo, esaki ta fortalece e “bon comun?” Hibando un politica sin honor y consenshi tambe ta parti di e “bon comun?” Shonnan, pa awor pueblo ta compronde caba cu “e bon comun” di AVP ta djis un “disfras comun!”
Alternativanan briyante
Minister Dangui Oduber a continua elaborando den su conferencia di prensa cu den rapport di professor Hubben Batenburg di BC Zorg, tin diferente recomendacion cu a wordo haci pa por reduci e gastonan actual. Den esaki e HOH y ImSan a formalisa un aliansa pa traha hunto, pa sigura y mehora e cuido medico aki na Aruba. Ademas a forga un cooperacion pa bay cumpra remedi hunto cu lo bay economisa AZV mas cu dos biaha loke e eigen bijdrage lo mester a trece aden. E compras di e remedinan hunto lo duna AZV un prijs hopi mas faborabel y asina por spaar basta placa. Di e forma aki pueblo lo no mester paga e eigen bijdrage mas. E creatividad y reformacion den AZV inicia pa minister Dangui Oduber a demostra liderasgo y cu no tur medida proponi pa CAFT mester afecta pueblo, pero cu innovacion y vision por trece cambionan positivo den AZV cu awor lo bay funciona mas eficiente y mas efectivo.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!