Minister Glenbert Croes ta splica con e contract aki lo beneficia pueblo grandemente!
No ta un secreto cu globalmente tin un crisis energetico andando. E impacto di e aumento drastico den petroleo, gas natural y scarcedad di diesel ta preocupante y tin su efectonan inflatorio global y ta complicando e recuperacion economico di hopi pais. Diesel su scarsedad ta masha preocupante mirando cu hopi trucknan, auto, fabricanan, barconan, diferente tipo di vehiculonan y industria ta depende di e fuel aki pa nan operacion. Esaki lo por afecta e crisis economico y energetico global mas ainda. Hulanda ta sufriendo di e segundo prijs di gas di mas halto na Europa. Miles di Hulandes no por paga e prijs di energia mas na cas y ta optando pa pasa frieuw e winter aki na nan cas. Esaki ta un gran realidad tur caminda na Europa y resto di mundo.
Pregunta y contesta riba prijs di gas natural cu WEB lo paga durante 20 aña
Pa e motibo aki mi a lansa basta pregunta durante di e reunion publico di dialuna, na minister Glenbert Croes, tocante di su maneho di energia. Un di e preguntanan importante tabata:
- Minister por splica Parlamento, mirando cu aworaki prijs di gas a subi enormemente globalmente, con e contract aki cu WEB Aruba N.V. a cera cu Eagle LNG ta beneficia nos pais? E prijs di gas cu nos a cera contract riba dje, lo keda substancialmente bao di e prijs internacional actual pa e duracion di 20 aña di e contract? Contesta: Eagle LNG lo bende WEB gas natural na e prijs di aña 2021 segun a acorda den e contract. Esaki ta conta pa e 20 añanan di e duracion di e contract. Gas natural ta hopi menos costoso cu HFO, e ta hopi mas limpi pa medio ambiente y awor e ta bai segura y contribui cu un produccion di coriente na un prijs hopi mas comodo pa WEB, cu na su turno lo bai traduci den un posibel mihor prijs stabiel pa pueblo pa loke ta trata awa y coriente. No lo mester hedge mas y no lo mester depende di e mercado instabiel di petroleo.
Esaki ta un bon noticia pa pueblo di Aruba!
Pregunta y contesta riba loke falta ainda pa Eagle LNG cuminsa cu construccion
Un otro pregunta importante cu tambe mi a puntra minister Glenbert Croes ta:
- Ta cual rapport falta ainda pa finalisa pa Eagle LNG por cuminsa construi e planta di Eagle LNG? Contesta: Solamente falta e environmental Impact Study cu ta cay bao di Dienst Natuur en Milieu (DNM).
Den otro palabra Eagle LNG ta yegando na su fase final pa por keda cla cu tur e rapportnan cu e mester cumpli cu ne y asina nos ta spera cu pronto nan por cuminsa cu e trabaonan di construccion.
For di cuminsamento mi a sostene e vision di e proyecto aki di Eagle LNG. Gas natural ta mas limpi y lo brinda stabilidad den e produccion di coriente na un prijs cu lo por beneficia pueblo. E crisis energetico a cuminsa ora cu Rusia a invadi Ukraina na Februari 2022 mientras cu gobierno a firma e contract cu Eagle LNG na december 2021, net un par di luna prome cu e crisis a cuminsa. Pa e motibo aki mi kier a finalisa ta felicita gobierno di a tuma e decision prome cu e crisis global aki a cuminsa lugar.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!
