Parlamentario Marco Berlis (MEP): DOW awor cu un loket digital unda bo por entrega keho of sugerencia online!

Na 2023 Gobierno di Aruba ta sigui traha duro pa digitalisa e departamentonan di gobierno. Specialmente departamentonan grandi manera DIP y DOW mester di esaki pa por brinda un servicio mas rapido, eficiente y husto na pueblo di Aruba. DOW ta brinda e pueblo di Aruba e posibilidad pa por entrega keho, of por pidi pa drecha un caminda cu asfalt, drecha un acera, camindanan di santo, lus di caya, molester di awa y mucho mas, digitalmente. Esaki por wordo haci hopi facil mes. Siguientemente mi lo duna pueblo e pasonan con pa haci esaki for di e comodidad di bo telefon, computer of tablet.

1. 1. Bay na www.dow.aw

• Click riba boton di “Formulieren”

1. Click riba e boton di “Formulier Klachten”
2. Riba e pagina aki yena tur bo informacionnan pidi y scoge e opcion (un so) pakico bo ta entregando un keho. Si kier entrega mas cu un keho, lo mester manda un otro apart (di nobo)
3. Mas abao riba e mesun pagina, describi den bo mesun palabra cual ta e problema y cual ta e solucion segun bo persona.
4. Mas abao riba e mesun pagina, primi e boton “Ga verder.”
5. Riba e pagina aki, bay ful abao, click riba e “hoki bashi” dilanti e frase: “Ik ga akkoord met de gevulde gegevens.”
6. Mesora riba e mesun pagina, primi e boton cora ful abao rechts “Nu verzenden.”
7. Inmediatamente despues un pagina lo aparece cu un number special. Warda e number aki.
8. DOW lo purba di trata e caso aki den 3 dia di trabao.

Cu e informacion aki mi ta spera como sirbidor di pueblo, cu pueblo por sa mihor con pa reporta  problemanan di infrastructura y wak e problemanan aki tambe wordo resolve pa DOW. E dies pasonan aki no a tumami mas cu 2-3 minuut. Ban usa e medionan cu ta na nos disposicion pa remedia situacionan peligroso of precario cu mester di atencion urgente. Hunto nos por logra cu nos pais ta mihor cada dia. Ban keda positivo y haci e diferencia unda cu nos por. Den e era aki di digitalizacion nos ta spera tambe cu e trabaonan di DOW lo bira mas eficiente, efectivo y asina trece alivio y solucionan rapido pa nos ciudadanonan!

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!