Aña pasa Comision Fiho di Empresanan Estatal a reuni cu WEB, Elmar y Utilities den Staten di Aruba. E tema di e reunion tabata riba e aumento di awa y coriente cu tabata pendiente. Den e reunion aki a duna un presentacion na Parlamento, den cual a comparti e dato y cifranan pa por a hustifica e aumento di prijs aki. E prijs di coriente originalmente tabata mara na un prijs di bari di petroleo cu tabata costa mas o menos $38 pa bari, y pa 3 aña Gabinete Wever Croes-I a hedge riba e prijs aki. Sinembargo e bari di petroleo a subi substancialmente te na $89.76 na September 2022, y pa $93.33 na October 2022. Den otro palabra, e bari di petroleo a bira como 245% mas caro cu loke e tabata prome y esaki a causa cu WEB ni Elmar por a absorbe e gastonan aki mas.
WEB A DUNA UN PRESENTACION DEN STATEN
Riba diahuebs 20 di oktober 2022, Comision Fiho di Empresanan Estatal a yama un reunion urgente cu WEB, Elmar y Utilities pa bin habri buki pa Staten por a haya bista den esakinan. Akinan WEB a bin demostra cu for di un reserva di 150 miyon florin esaki a baha te na 33 miyon florin den apenas 6 luna, pasobra WEB a absorbe e gasto di e aumento di petroleo sin hisa e tarifa di awa y coriente anteriormente. Cu e datonan aki nos por a compronde e urgencia di WEB pa subi e tarifa y ahuste na e prijs nobo di petroleo. WEB y Utilities a informa Parlamento cu lo tuma minimal 6 luna pa WEB por recupera e reservanan perdi di 127 miyon florin. Mirando cu WEB tin diferente prestamo y obligacionan pa cumpli cu ne, e ta keda importante pa nan tin nan reservanan na ordo.
COMISION KIER UN UPDATE DI E RECUPERACION DI WEB SU RESERVANAN
Mirando cuanto claridad e rapport y presentacion di WEB a duna Parlamento, e Comision Fiho di Empresanan Estatal lo bolbe invita Elmar, WEB y Utilities pa nos por wak si WEB a recupera su reservanan caba of cuanto falta pa yega. Esaki ta di sumo importancia ya cu di e forma aki pueblo tambe por wordo informa di e desaroyonan y pa ki tempo por spera un rebaho den nan utilidadnan.
Transparencia y integridad ta importante pa nos pueblo y nos intencion ta pa provee esaki debidamente. Mirando cu nos ta bibando den un tempo di recuperacion economico, cada florin cu pueblo por haya bek den su cartera, sigur lo ta bonbini. Como representantenan di pueblo nos kier sigui lucha pa locual ta husto pa pueblo pero tambe pa nos companianan di utilidad nacional sigui fuerte y saludabel pa por sigui aporta na nos comunidad y sigura un servicio di calidad.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!