Parlamentario Marco Berlis (MEP): Clarificacion riba e trayecto di e ley di BBO na frontera

Trayecto di e Ley di BBO na frontera ainda no ta cla. Ley no por wordo trata ainda

Mi por a nota recientemente un articulo den 24ora.com cu a declara den su articulo lo siguiente; “Por lo menos di e partido grandi den Parlamento, esta MEP, tin tres parlamentario cu no ta yegando trabao e dianan aki” y tambe e declaracion “MEP no ta completo: no tin quorum pa trata ley di BBO na frontera. Den e articulo aki mi nomber ta wordo menciona tambe. Mi ta kere cu 24ora.com a ekiboca su mes den tur dos declaracion y ta pesey mi articulo.

ACTUAL TRAYECTO DI E LEY DI BBO

Ora cu staff di 24ora.com bisa cu no tin quorum pa trata e ley di BBO, e mester sa tambe cu loke e ta papiando ta eroneo, pasobra ta awor apenas parlamentarionan ta trahando riba nan preguntanan pa Minister contesta. Ultimo dia pa entrega e preguntanan entrega ta diahuebs awo 15 di Juni. Despues di esaki, Minister mester contesta e preguntanan y mandanan bek pa Parlamento. Ta despues cu minister contesta e preguntanan por pone fecha pa un reunion publico pa debati riba e Ley di BBO na frontera y niun dia prome. Kiermen, e flie y ponencia cu MEP no tin quorum y pesey no ta trata e ley di BBO na frontera no ta subi. Te na ultimo ta menciona cu presidente Edgard Vrolijk mester a informa 24ora di e proceso aki. Lamentablemente toch ta opta pa skirbi un articulo largo yen di insinuacion sin base y sin contenido corecto, pa lanta negatividad contra fraccion di MEP. 

PRESENTE NA REUNION DI COMISION TRATANDO E TEMA CU BBO NA FRONTERA 

Ademas e ta importante pa remarca cu si mi tabata presente na pia di trabao e dianan aki. Mi a yega bek for di Hulanda, despues di a atende cu reunionan di IPKO, hunto cu e crew di 24ora riba diahuebs 8 di juni. Por puntranan by the way. Pa diabierna y dialuna mi tabata presente manera custumber na e reunionan di comision di Finansas hunto cu gremionan y tambe cu minister riba e tema di BBO na frontera. Den e reunionan aki mi por a sigui compara informacion y analisa feedback y preocupacionnan di gremionan. Normalmente un reunion di comision no ta tarda mucho mas cu 2 ora, sinembargo esun di dialuna cu Minister Xiomara Maduro y expertonan di DIMP y Douane a cuminsa 9am y a bay mas largo. Mi no por a keda den henter e reunion y mester a bay despues di dos ora pasobra mi mester a  biaha 1pm pa atende cu reunionan di trabao importante den exterior.

Mi compromiso cu pueblo ta total y como representante di pueblo mi ta haci mi maximo esfuerso pa semper bin dilanti cu informacion alcaso y veridico. Pueblo merece lo mehor! Conta cu mi pa informacion cu bo por confia riba dje. 

Si pueblo desea mas informacion di e articulo aki, of kier un reunion cu mi, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!