Investigacionnan y caso den corte ta sigui revela detayenan condenabel
Nos por a wak con un oposicion desespera ta cuminsa dal salto di panico pa trata na hustifica nan acusacionan contra e presupuesto 2023 di gobierno. No ta nada straño di parti di oposicion, pasobra tur cos cu e gobierno aki a bin cu ne nan a bay contra di dje. Tur esaki oposicion ta haciendo, pa pueblo no enfoca nan mes riba e desaroyo di e caso di corupcion di mas grandi den historia di Aruba: Caso Avestruz.
Por a wak hechonan sumamente desastroso ta bin dilanti den corte. Cada bes mas detayenan ta bin dilanti den corte cu Benito no por contesta of ta contesta di un manera bastante slap. Ainda Benito kier usa su “krantenknipsels y copia di notulen” como argumento contra nos Minister Presidente, mientras esaki a wordo bari for di mesa pa Ministerio Publico. E dolor y panico di Benito y Mike Eman ta evidente; Benito su krantenknipsels no a dun’e e consuelo y speransa fabrica cu e mester den su situacion precario.
Memey di tur esaki tambe tin e investigacion di Kukwisa cu ta inclui ex-minister Marisol Lopez-Tromp, cu ta wordo investiga awor tambe den caso Diamante. Un Marisol cu hunto cu Mike Eman a aproba e megadebe di Aruba, a yuda introduci CAFT, un ex-voorzitter di Staten di Aruba cu a gaña cu sr. Dammers a dale den Parlamento live na television, pa despues e mes confesa cu el a gaña y wordo condena den un Tom-zitting. Un Marisol cu a critica cu parlamentarionan di coalicion pa legalisa e ley di TPEF di 2020-2021, mientras cu e mes a haci esaki na 2011-2012, unda el a aproba e TPEF di 2011, cu mester a wordo legalisa na 2010, te na 2012 anto sin pandemia. Marisol sa cu articulo 11 den e ley ta duna espacio pa esaki, sinembargo ta keda hunga show continuamente. Si tin un hende cu sa di comedia ta Marisol.
Awor oposicion ta cana sali di Parlamento, pa bay hunga show dilanti camera y noticiero paga, pasobra nan kier sigui manipula pueblo. Ta di lamenta cu nan no kier debati den Parlamento, pa via di Avestruz cu ta den corte awor, y tambe investigacionnan andando di Kukwisa y Diamante. Pueblo ta paga oposicion pa ta den Parlamento y controla gobierno. Enbes di haci nan trabao cu pueblo ta paga nan pe, nan ta yega Parlamento na pia di trabao pa sigui cu nan show cu prensa. Y aunke Marisol a wordo acusa di ta corupto pa su mes partner di coalicion di AVP, Benny Sevinger, keto bay e coalicion di oposicion lidera pa AVP ta mas uni cu nunca. Ta Ministerio Publico a publica e gran berdad aki ora cu a seponeer e acusacion ficticio di Benito. Ta kico ta uni e coalicion di AVP asina fuerte cu hasta traicion entre nan, nan ta soporta? Lo ta un “bon comun en comun?” Lo ta e hamber pa poder camufla pa e “bon comun?” Un Miguel Mansur cu ta grita cu mester kita cientos di ambtenaar, kita tur overtime di KPA, y laga RWZI rementa paso e no kier pa inverti den esaki! Esaki ta e “bon comun” cu Mike y Miguel ta papiando di dje? Manera ma bisa anteriormente, esaki ta simplemente un “desastre comun!”
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!
