Pronto lo mester sali e decision final si lo bin un aumento di salario minimo pa januari 2023.
Mi por a observa tanto den e reunionnan publico di prespuesto 2023 y den articulonan di corant di coleganan cu a papia masha hopi mes di e salario minimo. Si mester subi’e of no, cuanto mester subi y si esaki di berdad lo tuma lugar na 2023. Mi por a observa cu prensa paga pa oposicion ta cambia mi titulonan constantemente riba e tema aki y practicamente tur loke mi ta publica, pa asina e titulo ta parce di ta contradeci mi articulonan, mi postura y rueda di prensanan anterior. Esaki ta un obra di malicia intencional cu mi ta denuncia abiertamente. Sinembargo mi ta continua riba mi ponencia original y nunca mi a desvia di esaki; “salario minimo mester subi”.
Gobierno ta reaccionando riba mi insistencia y ponencia
Como parlamentario mi a haci uzo di mi recursonan y asina tambe mi a dirigi preguntanan oficialmente via Parlamento dirigi na Minister di Energia, Labor y Integracion sr. Glenbert Croes tocante di e tema aki. Mi por a wak den e disertacion di ambos minister Glenbert Croes y sr.Geoffrey Wever cu tin nan pensamentonan riba e aumento di e salario minimo. Ambos a splica e proceso cu esaki tin di pasa pa e aumento por wordo aproba. Mi por a compronde cu un decision riba e tema di salario minimo mester a tuma lugar riba diahuebs 17 di november. Minister Glenbert Croes a pone enfasis cu e aumento lo por ta entre 4.2% pa 7.7%. E aumento aki lo yuda e homber chikito cu ta sufriendo mas bao di e inflacion global, e crisis energetico cu ta asotando mundo henter, aumento di flete, scarsedad di producto cu sigur a causa productonan pa subi tur caminda na mundo, incluso Aruba. Mester remarca tambe cu mas di 60% di nos poblacion ta ganando 2500 florin of menos pa luna.
Husticia y esfuerso pa crea un miho Aruba mester bin di tur stakeholders
E ta importante pa bisa cu tur stakeholders aki na Aruba tambe tin e deber di crea un miho Aruba cu nan contribucionnan den sociedad y unda cu nan por pa haci un aporte positivo na e desaroyo di nos pais. Esaki nunca mester wordo laga den e mannan di gobierno so y sigur esaki no ta e caso. Pesey mi ta kere cu e stakeholders lo considera e tema di salario minimo aki seriamente y mi speransa ta cu e biaha aki SER lo recomenda un aumento husto y realistico pa esunnan cu mas mester di dje. Aruba semper a sa di prospera, lucha y vence tur obstaculonan y lanta ariba apesar di tur e retonan grandi cu nos a yega di confronta. Pesey mi ta keda positivo y ta spera cu nos lo wak un anuncio positivo pronto riba e decision pa aumenta salario minimo.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!