segun sra Arends-Reyes den e dianan aki, Aruba como pais ta pasando den momentonan cu ta yega na un crusada atrobe pa determina con Aruba lo sigui recupera. Cantidad di vuelonan ta aumentando y ta yegando Aruba pero ainda no por compara e cantidad di vuelo cu e cantidad di pasahero di antes. Por ehempel siman pasa 24 vuelo a trece aden 1664 pasahero cu ta un promedio di 60 y pico pasahero pa vuelo pa avionan di capacidad di 3 pa 4 biaha mas hopi. Awor cu lo sigui habri frontera cu mas pais, cu esaki lo pasa cu of sin visa mester percura pa hopi mas pa seguridad riba nos isla. E situacion na Aruba mes no ta facil, falta hopi trabou ainda, hopi famia no sa con lo continua den un situacion di instabilidad laboral of hasta ta pensa di bai biba na Hulanda. Tambe no tin palabracion fiho te ki dia lo tin ayudo pa cu esnan cu no tin paspoort Hulandes y plazonan di banco a caba. Departamento di belasting ta bezig ta cobrando y exihiendo pago di ciudadanonan y pensionadonan debenan atrasa y companianan di Utilidad tampoco no ta mucho tolerante mas siendo cu no ta spaar e hendenan ta spaar pero e ingresonan manera antes no tey.
Mantene na protocolnan
Un otro aspecto tambe ta cu na momento cu nos casonan activo subi nos economia por bolbe sufri grandemente, pesey e cooperacion y concientisacion di nos ciudadanonan pa mantene e protocolnan di hygiena estrictamente pa evita brotenan di contagio lo determina con mas liher nos por recupera. Durante e pandemia aki Aruba su economia a bai plat pa motibo cu nos pilar economico principal cu ta Turismo a sufri grandemente, na mundo como un di e paisnan cu mas ta depende di e exito di Turismo. Y Aruba den e transcurso di tempo a logra aumenta e exito di Turismo como destinacion grandemente. E exito di Turismo ta depende kiko bo tin di ofrece como producto Aruba y con bo ta distingui bo mes di otro destinacion. Como producto Turismo bo no por percura pa solamente partinan di bo isla ta bunita pa wowo di e bishitante lubidando unda e trahador mes ta biba of unda e por core bais of hasi ehercicio pa mehora su salud, e contraste di desaroya un parti so no ta aceptabel mas mirando cu e pueblo pagado di belasting tambe kier mira con nan contribucion lo mehora nan calidad di bida. Tur esakinan a exihi inversion di un pais, awor ta keda pa mantene e producto Aruba y por ehempel matanan mester wordo corta of reemplaza y camindanan manteni, por cierto dor di yobidanan e camindanan di santo a deteriora enormemente. Tempo aya cu gobernacion di AVP a hañe ta solidifica e fondo di SVB cu mas cu 400 miyon florin den un solo biaha y aumenta edad di pensioen desde 2015 gradualmente, algo cu hopi partido no kier a hasi pa no aumenta debe di pais y hasta tin partido a campaña na 2017 pa baha edad di pensioen na 60 back pero cu awe ta ripara cu e no lo ta decisionan sostenibel. Awor hasta lo mester evalua si ta aumenta edad di pensioen mas aki algun aña. Tur e decisionan cu Aruba mester tuma den e transcurso di tempo mester ta decisionan cu nos isla y trahadornan, companianan y gremionan por carga pesey e iniciativa tambe di AVP e scucha di e personanan mes kiko nan ta experienciando y kiko e efectonan di decisionan lo ta. Un gobierno no por biba pensa cu ta pa semper lo goberna un pais, poder ta caba y proyectonan y gremionan mester por papia y traha cu tur partido. Si gremionan, profesionalnan y instancianan no tin libertad mas den e pais aki pa sinta cu partidonan grandi riba e isla nos lo ta bibando un dictatura di berdad.
Acepta fiansa bou condicion di Rijkswetten
Aruba semper a para riba su mesun pia y no sa pidi donacion di Hulanda, e fondonan cu lo haña pa motibo cu a acepta e Rijkswetten lo ta pa fiansanan nobo na 0% cu tambe pueblo lo mester paga. Aunque cu Aruba tawatin su Status Aparte, Hulanda a tuma e islanan como igual pa haña entidad y tur decision cu bai en contra di palabracion lo no ser acepta, pero asina mes por ehempel Corsow a haña donacion di 62 miyon florin pa inverti por ehempel den Enseñansa siendo cu na Aruba lo yuda cu experticio tecnico y cooperacion pero e inversionan di biaha pa yuda aumenta of mantene e calidad nos no a haña y esaki ta di lamenta sra Arends-Reyes ta termina bisando.