Parlamentario Independiente Ryçond Santos do Nascimento ta un profesional cu hopi ciudadano ta esunnan cu ta yega cerca dje y ta trece diferente preocupacionnan padilanti. Un situacion cu sigur ta hala hopi atencion di e parlamentario ta sex pa fabor laboral cu ta creciendo na Aruba. Esaki ta un situacion cu ta biba den nos comunidad y lamentablemente e ta creciendo.
Tin storianan di politiconan riba acoso sexual, intimidacion sexual, pidi fabor sexual, priminti trabao acambio di fabor sexual. Segun parlamentario independiente Ryçond Santos do Nascimento hopi ta loke ta tende y hopi informacion ta yega cerca su persona y ta di lamenta.
Sinembargo no ta papia di politiconan recien so, pero tambe di politiconan den pasado. E sorpresa di henter esaki ta cu ta parce cu e ta un virus completo den e organo labora y ta basta contamina unda cu sex ta hunga un rol pa ricibi un bon trabao of posicion den trabao, esaki e parlamentario independiente ta lamenta, un profesional no mester di esaki y un profesional no mester wordo husga entre su diploma y sex.
Esaki ta un problema y parlamentario Ryçond Santos do Nascimento ta kere cu Aruba mester crea hende nan mas sigur di nan mes y personanan cu no ta tuma nada cu lo perhudica nan y para pa nan principionan moral. Un hende muhe no tin mester di tuma nada di un hende homber of un otro persona si e no kier. Sinembargo Aruba tin un postema cu a crea generacionnan cu nan norma y balornan ta hopi abao y cu ta uza nan curpa pa por yega unda nan kier yega y esaki ta un pensamento robes den nos comunidad. E generacion nobo lamentablemente cu a keda contamina ta kere cu e procesonan aki ta algo normal cu ta sosode, pero e realidad ta cu si bo norma y balornan ta halto esaki no ta un situacion normal.
Sinembargo e postema den comunidad ta asina fuerte cu na momento bo norma y balornan ta halto pa bo ta un ser humano respeta pa ken bo ta, bo ta wordo kibra door di e mes un organo di poder, y esaki ta crea cu hende ta pensa y kere cu nan ta robes y ta cay den e loep y haci actonan contra di nan principio pa tambe ta hoort der bij y pa por sobrevivi riba un pais asina chikito manera Aruba.
Sinembargo no ta descarta cu tin hopi hende muhe ta pensa mes un cos pero cu ta keto y ta tras di cortina pa nan no wordo captura, tambe e grupo di hende muhenan aki ta sintinan hopi biaha nan so y ta wak rond di nan y ta kere cu no tin hende muhe manera nan y ta isola nan mes. Parlamentario Ryçond Santos do Nascimento ta kere cu nos comunidad mester tin mas fe y resa hopi y keda kere den nan mes y poco poco lucha contra di e coriente negativo pa bolter e negativo pa positivismo pa nos futuro generacion. Parlamentario independiente Ryçond Santos do Nascimento ta kere firmemente un cambio positivo ta posibel, pero esunnan sano mester keda pusha y combati e sfeer negativo cu tin riba e comunidad di Aruba.
