Parlamentario independiente Ryçond Santos do Nascimento ta duna di conoce cu si mester scucha tur politico nan den parlamento tur ta pro pa Aruba tin su Ombudsman. Tin un impresion robes den comunidad cu Ombudsman ta bay salba Pais Aruba, esaki no ta cuadra cu berdad, segun Parlamentario independiente Ryçond Santos do Nascimento.
Si mester mira posicion di Ombudsman na Hulanda na momento cu nan a bin cu ne e la wanta man riba cabes di gobierno Hulandes pa añanan largo unda cu a bini uno y a bini otro. Esaki a keda sosode te na momento cu e bini un Ombudsman cu si tabatin e cohon unda cu a cuminsa pone presion riba gobierno di Hulanda asina e cosnan a cuminsa move , segun Parlamentario independiente Ryçond Santos do Nascimento.
Pa kico ta importante pa Aruba sa di e historia debi cu e Ombudsman no ta un funcion cu por duna un castigo na gobierno. Un Ombudsman su poder ta papia y skirbi rapport. Pa e motibonan aki Parlamentario independiente Ryçond Santos do Nascimento ta kere cu Aruba mester di un Ombudsman imparcial cu tin e curashi di bay contra e politiconan mientras cu na Aruba tin hopi hende cu tin miedo pa represalia politico. Na momento cu bo ta un profesional na Pais Aruba mester ta hopi cauteloso con ta anda cu e politiconan debi cu persecucion politico ta un realidad di nos politica na Aruba.
Segun Parlamentario independiente Ryçond Santos do Nascimento pa e motibonan aki mes varios parlamentario tabata kier un procedura mas pisa pa por scoge e Ombudsman. Sinembargo mayoria den parlamento a dicidi den un otro forma y a traha e ley unda cu a adapta esaki manera cu tabata desea. Sinembargo Parlamentario independiente Ryçond Santos do Nascimento tin speransa cu parlamento por kies un bon Ombudsman y e speransa ta keda cu for di e prome salida caba por logra haya un persona cu tin e curashi y cu tin e conocemento y fundeshi di norma y balor pa por bisa gobierno loke cu nan ta haciendo sea ta bon of no ta bon.