Parlamentario independiente Ryçond Santos do Nascimento a sigui e desaroyo cu a tuma luga den Hoogeraad pa ley di matrimonio di mes un sexo, e parlamentario a mira e decision di hoogeraad y ta kere cu mester haci tur cos posibel pa anula e decision di hof y di hoogeraad, sinembargo no ta significa cu lo kita e decisionnan, pero tampoco esaki no ta significa cu no tin caminda pa cana.
Aruba mester cambia su constitucion y hancra matrimonio entre homber y muhe den nos constitucion y mester hancra referendum den constitucion pa asina por subraya cu esun cu ta dicidi riba e futuro social y cultural di e pais aki ta e pueblo mes y no ta ningun hues di hof mester por haci esaki of huesnan di hoogeraad.
Na momento cu a tuma nota di e decision di hoogeraad loke cu hoogeraad a haci ta apoya hof , e ora mester puntra nos mes y analisa kico ta loke hof a haci.
Segun Parlamentario independiente Ryçond Santos do Nascimento hof a haci dos cos, un di nan ta bisa cu tin un violacion di e prohibicion di discriminacion ora ta trata di nos codigo civil, cu otro palabra nos codigo civil ta viola e prohibicion di discriminacion y ta husga esaki abase di nos mes un constitucion.
Na momento cu ta mira esaki nos mester analisa dicon hof ta bisa cu nos codigo civil ta discriminatorio, dicon matrimonio tradicional entre un homber y un hende muhe ta discriminatorio segun hof. Ta di lamenta cu hof no a bay haci un analisis di wak si e persona cu ta casa abase di matrimonio den nos codigo civil si e tin mas derecho cu parehanan homosexual, esaki no ta loke cu hof a haci.
Hof no a bay wak si e pareha cu ta casa, esun cu tin matrimonio abase di codigo civil tin mas beneficio fiscal di belasting, di cuido, pa herencia lamentablemente hof no a bay mira nada di e partinan aki. Segun Parlamentario independiente Ryçond Santos do Nascimento loke cu hof a enfoca riba dje ta e balor agrega di matrimonio, e balor emocional , e balor simbolico.
Si mester mira loke cu hues ta haciendo enbes di mira kico ley ta prescribi y kico derecho ta prescribi e hues ta bay wak loke ta lo simbolico y na unda cu hues ta drenta directamente den e area sagrado y hues no por reparti locual cu ta sagrado, e no ta su tarea, e no ta su competencia y e no ta su poder. Den nos comunidad nos tin e balor simbolico di matrimonio paso e ta parti di nos cultura y cu e tin su raiznan den religion.
Na momento cu nos tur a lanta ta scucha e historia di adam cu eva y tambe cada pasco ta scucha e historia di nacemento di hesus, mama maria, san hose cu ta ehempel nan di famia cu nos tin desde chikito. Na momento cu nos ta scucha cu matrimonio ta un sacramento e aspectonan ey den nos cultura, den nos custumber como pueblo, esey ta duna e balo agrega na matrimonio.
Mirando esaki y pa un hues kier horta e balor sagrado simbolico y cambia esaki y transforma e cultura di un pais , esey no ta un tarea di ningun hues
E di dos eshu di hof ta cu Hof ta haya cu como cu e ta algo den pensamento di hof ta algo cu ta cambia facilmente. Sinembargo cambia un cultura ta facil paso ta dies cambia locual cu ta den ley cu ta pone cu unda cu ta lesa awo cu matrimonio ta entre un homber y un muhe, awo mester lesa cu matrimonio ta entre un muhe cu muhe, homber cu homber y muhe y homber aki ta caminda cu hues a mishi cu algo sagrado y cambia e definicion di locual ta matrimonio y esey no ta tarea di hof , ni hues y hoogeraad a bay mee cu e locura aki y esaki ta activismo, segun Parlamentario independiente Ryçond Santos do Nascimento.