Mi tin un simpatia grandi pa Benny Sevinger. Como politico e ta papia bon. Como
hende e ta mishi cu bo alma ora bo lesa con el a yora dilanti di hues, contando su
sufrimento durante e investigacion di caso Avestruz. Marisol Tromp tambe ta un politico
cu mi ta simpatisa pa varios motibo. Durante hopi aña e ta parce di ta un persona cu
repetidamente a bira victima di crueldad di parti di Nel Oduber, Chris Dammers, Otmar
Oduber y na ultimo Evelyn Wever-Croes.
Sin embargo e revelacion di mas grandi, pa mi, di e caso Avestruz ta e coneccion entre
Benny y Marisol. Den e sentencia di Hof di dia 12 di juli 2024 nos por lesa di pagina 17
te cu 23 un splicacion amplio di e proceso coruptivo cu Benny tabata uza. E
comerciantenan cu tabata desea un tereno mester a haci nan peticion dirigi na Benny.
Benny na su turno tabatin un libertad demasiado grandi pa dicidi ken e ta duna tereno,
sin ningun problema legal pa motibo di un poder coruptivo den nos ley di otorgamento
di tereno (articulo 25c LUE).
A base di e elemento coruptivo den ley Benny tabatin e poder pa otorga terenonan bao
di e condicionnan cu e mes tabata stipula pa cada caso individual. Hof ta mustra cu
Benny no a haci nada pa elemina e poder coruptivo aki.
Benny tabata gaña tur comerciante cu nan tabata haya un trato igual. E tabata gaña cu
tur lo a haya nan tereno segun nan beurt a base di e principio First In, First Out (FIFO).
Pero, e evidencia ta mustra cu Benny tabata faborece Leoncita y Susebeek pa
probecho personal. E evidencia cu Hof a uza ta inclui e testimonio di Sjak-Shie. E
tabata director di DIP bao di Marisol y di Benny di 2005 pa 2010. Sjak-Shie a mustra cu
e tempo ey ni Marisol ni Benny no ta tene nan mes na e maneho, manera principio di
FIFO.
Loke ta mas interesante ainda ta cu no ta Benny a inventa e draaiboek di corupcion.
Aparentemente ta Marisol ta e arkitecto. Den e relato di NoticiaCla fecha 15 di mei 2024
ta mustra cu hues a haci pregunta na Benny encuanto e proceso pa por haya un
tereno. Durante e interogacion aki Benny a laga sa cu no tabata existi regla specifico pa
otorgamento di tereno. Benny a sigura hues cu ora cu el a bira minister, el a informa su
mes kico e proceso tabata bao di Marisol y siguientemente Benny a dicidi pa mantene e
proceso mescos. Cu otro palabra Benny no a haci net nada pa elemina e poder
coruptivo for di proceso cu el a hereda di Marisol.
2
Ora nos pone e sentencia di Hof banda di e WODC-rapport di 2010 tur cos ta cuadra.
Riba pagina 171 te cu 173 e rapport ta mustra cu Marisol ya caba tabatin e poder
coruptivo cu despues a hiba na condena di Benny na cuater aña di prison. Es mas, e
WODC-rapport ta sigui mustra cu Marisol a uza e poder pa viola e principio FIFO den
aproximadamente setenta caso. Pa colmo mayoria di e violacionnan aki a tuma luga net
prome y durante e campaña electoral di 2009. Pero, toch Benny den capacidad di
minister nunca a entrega un denuncia serio contra Marisol. Ta te ora cu el a sinti e
rosea cayente di husticia el a core hinca un cos straño den otro, acusando Marisol y
Evelyn, pero sin basha abao riba e triki y trampa cu el copia di Marisol.
Aña 2009 ainda Marisol tabata candidato pa MEP. Cuater aña despues, na 2013,
Marisol a bira parlamentario pa AVP. Probablemente pasobra Benny tabata uzando
Marisol su draaiboek, nunca Marisol a basha abou riba Benny. Tampoco Marisol a pasa
cualkier mocion pa kita e poder coruptivo for di e minister di infrastructura. El a djis
apoya Benny y Gabinete Mike Eman II te ora cu el a clash cu Dammers.
Ta danki na e trabao grandi di Landsrecherche, Ministerio Publico y Corte Comun awe
nos sa con Marisol den MEP a crea caminda pa Benny den AVP, perhudicando hopi
comerciante. Ta danki na nos cadena hudicial awe nos por compronde con AVP a uza
ley di tereno comercial pa facilita tereno facil pa friends & family enrikece nan mes.
Mientras tanto comerciantenan serio mester a cumpra e terenonan via un construccion
legal na prijsnan exorbitante. Asina e orbita di politiconan aki a obliga e comerciantenan
hisa nan prijsnan, aumentando e “cost of doing business”, aumentando inflacion y
aumentando pobresa.
