Parlamentario independiente, mr. Gerlien Croes Edgard Vrolijk a coba su propio graf faltando respet pa e institucion di parlamento

E situacion compleho cu ta reina e dianan aki entre partnernan di coalicion y como antesala na cambio
di aña parlamentario no ta bin como ningun sorpresa pa parlamentario independiente mr. Gerlien
Croes. Tabata bek na luna di mei di e aña’ki cu e propio Croes a bolbe denuncia e deficiencia den
liderazgo di Parlamento di Aruba na man di president Edgard Vrolijk.
E tempo ey Croes a menciona cu no ta trata solamente di loke publico por mira ora di reunion, pero
tambe durante reunion di porta cera cu Vrolijk ta demostra di no tin etica ni respet pa ta sinta na cabes
di e entidad mas halto di pais Aruba.
Segun e parlamentario independiente, e intento pa sconde fayo den yama reunionan publico y cu asta a
bay asina leu cu a tira e propio figura apolitico di Griffier bou bus durante e proceso di atende reunion
riba e topico di matrimonio di mesun sexo, ta wordo califica como weganan politico di MEP lidera pa sr.
Vrolijk, sin importa ken nan ta sacrifica den e proceso.Di mesun forma, e partido geel ta djis conta cu su
partner den coalicion, esta RAIZ lo para nan tras na tur momento, te hasta bayendo contra di nan propio
principio.
Biniendo bek na e siman aki, Croes ta considera cu loke ministernan di MEP a haci di hiba campaña di
sosten ariba medianan social pa Vrolijk, ta un atake demostrativo contra e democracia di Aruba door di
publicamente demostra nan apoyo pa un candidato pa president di parlamento, confirmando de facto
cu e gobierno actual tin e poder ehecutivo y e legislativo secuestra.
Croes: “Mi mes a experiencia hopi sucedido cu Vrolijk; hopi falta di respet. No ta desconoci cuanto biaha
el a silencia miembronan. Na varios ocasion ta paga mike ora cu mi ta hibando disertacion of tin punto di
ordo. E ta manera cu nos a pasa pa un sistema autoritario y comunista pasobra ta un partido ta hiba
gobernacion, pero tambe tin Parlamento di Aruba full bou su maneho”
Mas aleu e parlamentario independiente a indica cu e realidad ta cu pa tres aña largo tin un partido cu
ta acepta e comportacion aki, refiriendo na RAIZ. For di contract di Eagle LNG te na matrimonio di
mesun sexo tabatin caba mil motibo pa RAIZ tuma un posicion pero nunca a hasi esaki.
Echo ta cu actualmente, mayoria di parlamento no ta di acuerdo cu Vrolijk por keda fungi como
presidente di parlamento.