Siman pasa Mike Eman a sali defende su ex-ministernan. Den su mente e ta mira Henny, Watty, Tico, Paul, Benny y Otmar banda di dje. Hunto nan mensahe ta cu henter e cadena hudicial ta corupto. Hulanda, Procurador General, Ministerio Publico y Landsrecherche tur ta marionetanan di MEP. Hasta hues no ta scapa, pasobra segun Mike y Benny hues a pone man riba cabes di Ministerio Publico.
Pero e rabia contra Ministerio Publico tin un motibo simpel. Ministerio Publico ta bezig ta desenmascara Mike pa hende por cuminsa realisa cu AVP tin tur caracteristica di un organisacion criminal. AVP ta chica comerciante pa asina haya fondonan pa campaña. Como recompensa AVP ta percura cu e comerciante tin acceso na tereno comercial, ontheffing y na diferente tipo di permiso. No a importa AVP cu esaki a causa pobresa den nos comunidad. Basta nan tin acceso na poder.
Toch ta interesante pa nos analisa e acusacion di Mike cu Ministerio Publico ta marioneta di MEP. No lubida cu ta hustamente Mike ta experto den e materia di metemento politico den OM. P’esey e sa di e metemento di Henny y Watty den husticia y Ministerio Publico. Esaki a sosode den añanan nobenta, anto pa faborece narcotrafico. Dado momento Jossy Arends a cay cera na Merca, pa sospecho di narcotrafico y labamento di placa. Uzando su funcion como prome minister Henny a core bay defend’e dilanti autoridadnan Mericano. Henny a bay asina leu di gaña Merca cu Hulanda ta para tras di Henny. Despues di Henny tabata turno di Watty. Ora Merca a cuminsa investiga e primonan Alex y Eric Mansur, e primonan a pidi Watty pa mete den Ministerio Publico. Cu placer Watty a bay purba evita e extradicion di e primonan pa Merca. Danki Dios Procurador General a par’e.
Mike sa di e pasado di AVP, pero e sa tambe kico tabata pasa den su mesun gabinete. Caso IBIS ta demostra cu Paul tabata bende ontheffing. No pa beneficio propio solamente, pero tambe pa beneficio electoral di AVP. O sea, AVP tabata trahando duro pa corumpi nos comerciantenan, pa nan custumbra duna placa na e partido, pa nan por conta cu un fix di parti di “Bo partido amigo”.
Caso Avestruz ta mescos. Atrobe AVP a crea un comercio cu patrimonio di pueblo. Nunca pais Aruba a conoce un nivel di astucia y inteligencia criminal asina halto. Benny a laga Leoncita y otronan estafa pueblo. Den un solo transaccion Leoncita a strica mey miyon florin, mientras tin hopi pobresa den pueblo. Segun nan, Leoncita tabata merece un regalito pa motibo cu el a milita duro pa partido. Caso Avestrus a demostra cu comerciantenan a soborna Benny. Benny a tuma e soborno. Es mas, e comerciantenan a haya loke nan a soborna Benny p’e. Den e caso Avestrus Susebeek a haya 2 aña di prison. Ademas 1.3 miyon Dollar di Susebeek a wordo confisca na un banco na Corsou. Leoncita a haya 24 luna di prison pa estafa di Pais Aruba. Ta e figuranan aki ta sponsor campaña di AVP.
Caso Flamingo tambe ta compromete AVP. Corda cu ta Henny cu Tico a duna Otmar su formacion politico. Despues Tico mes a haya un condena na 2008 pa corupcion y soborno. Despues di e caso ey e partido a traha duro pa ta mas cauteloso pa wordo gara. P’esey awe Paul, Benny y Otmar ta zona mescos.
E realidad ta Mike ta un berguensa pa historia di nos pais. En bes di para pa pueblo y pa berdad el a dicidi pa para na banda di corupcion. Dia cu Mike de Meza a gaña pueblo, Mike tabata na banda di Mike de Meza. Asina Mike sistematicamente a demostra cu su amigonan ta mas importante cu Pueblo. Dia cu su partido tabata dilanti un escogencia claro si AVP ta kies pa integridad of corupcion, Mike a kies pa corupcion. P’esey ta importante si bo ta un persona cu ta kere den husticia, den haci lo corecto y pone pueblo na prome luga, nunca mas bo vota AVP y mucho menos Mike.
