Den e dianan cu a pasa nos a scucha hopi di RESPALDO y e tema di subsidio. Hasta politiconan di oposicion a saca esaki for di contexto pa purba bruha tera ariba e area di salud mental. Pero Minister Tjon cu a atende e situacion pro activamente a sinta cu e hunta di supervision di RESPALDO, y AZV pa trece claridad y un solucion ariba e tematica aki pa pueblo y specialmente e clientenan di RESPALDO.
Subsidio di Respaldo
Tocante e subsidio di 900 mil florin, esaki ta e realidad. AZV ta e instancia cu ta percura pa paga RESPALDO. Pero e peticion tawata pa RESPALDO ta mas transparente cu AZV como cu RESPALDO ta haya un lumpsum sin ta splica detayadamente na unda y na kico e fondo ta wordo uza. E tempo di haya lumpsum (esta un suma di placa sin por splica e detayes na unda tur e ta wordo gasta) mester keda pa pasado y mescos lo tin di conta pa Hospital tambe cu tambe ta haya lumpsum. AZV ta esun encarga pa bini cu e cambio aki, pa asina segura e existencia di e fondo di nos seguro medico. Nos ta contento cu Aruba tin un RESPALDO y ta contento cu nan ta bon ekipa cu profesionalnan. Pero no por kita for di bista cu mester bini un mehoracion den e forma cu ta atende cu fondo financiero, mas aun si nos kier pa nan keda existi y sigui duna servicio di calidad optimal na tur cliente.
RESPALDO den transcurso a ricibi 300 mil florin caba. E hunta di supervision di RESPALDO cu a sinta cu Minister Tjon y AZV, ta na altura caba di e rekisitonan cu tin di cumpli cu ne pa por ricibi e suma cu falta. Na momento cu RESPALDO cumpli cu e palabracionnan haci cu AZV lo por paga esaki. Ta bon pa bisa tambe cu AZV a pidi asistencia den forma di un tercer partido pa asina por logra cu e proceso cu RESPALDO cana bon.
Politica di bruha tera
Nos a tuma nota cu Dowers den recess ta hunga metselaar, bruhando tera ariba un tema asina sensativo y serio. Treciendo panico cu RESPALDO ta bai sera su portanan y cu ta algo robes cu Gobierno a laga Salud Mental resorta bou di Asuntonan Social. Ariba e ultimo ponencia ta bon pa indica cu e ta saca esaki for di contexto. Siendo cu e sa bon cu tin di atende esaki den su contexto. Na Aruba y region, nos problemanan social ta acapara suficiente sintomanan manera di adiccion, ansiedad y depresion, cu ta sintomanan di salud mental. Den pandemia esaki a resalta y a crece mucho mas. Esaki ta hustifica e motibo pa inclui Salud Mental bou di e capa di Asuntonan Social pa esnan den e veld por traha hunto cu un bista mas amplio ariba e problema cu ta asotando nos. Ta lastima si cu Social Crisis Plan a termina, como cu e plataforma lo a duna un dimension mas profundo na e combinacion actual di e ministerio aki, y sigur lo por a brinda un mihor observacion, registracion y terapia na famianan den dificultad cu e problemanan multiple aki.
Apesar di esakinan, mi por bisa cu ya hopi a wordo logra, y esakinan nos lo cuminsa mira e frutonan e aña aki mes ainda. Nos ta bayendo den un bon direccion pero sigur lo tin di sigui restructura e parti financiero pa un futuro duradero. Por ultimo nos ta lamenta cu den reces metselaar Dowers, ta hunga politica di bruha tera cu un tematica asina serio, siendo cu Gabinete Wever-Croes ya caba a aumenta e presupuesto di RESPALDO cu casi 50% compara cu locual Gabinete Mike Eman 1-2 tawata presupuesta pa nan.