Diaranson tawata un dia historico pa e instructornan di landamento escolar. Como cu 19 instructor porfin a firma un contrato pa duracion largo, esta e proximo 5 añanan nos dilanti. Tawata den e auditorio na John F. Kennedy unda cu e 19 instructornan a firma nan combenio cu Gobierno di Aruba pa asina nan por habri e aña escolar cu un trankilidad mental pa por sigui siña nos muchanan con pa landa.
Minister Endy Croes a haci entrega di e contratonan na cada un instructor y bo por a nota e alegria den cara di cada uno di nan. E instructornan aki a percura pa aña pasa alrededor di 1000 (mil) mucha siña landa y haya sea Zwemdiploma A o B durante e examen di Landamento Escolar y sigur tabata un previlegio pa mi por tawata presente yamanan pabien na e momento aki, como cu landamento escolar ta un Proyecto andando pa casi 30 aña y ta awor un contrato asina largo den tempo ta wordo concretisa. For di Gabinete Wever Croes 1, hunto cu mas parlamentario nos a bini ta bringa pa esaki y ta cu gozo nos por a mira e resultado awe.
Un danki tambe na directie Onderwijs y henter nan team excepcional. Na SIMAR cu a para cu e instructornan tur momento, y na Gabinete Wever Croes 2, en especial Minister Endy Croes cu e logro aki. Pero tambe un danki na e instructornan mes, cu a persevera tur tempo y a carga pasenshi pa esaki. Ainda mi ta corda cu ya desde 17 di November 2020 nan respresentantenan tabata den un encuentro publico aki den Parlamento pa bin presenta nan preocupacion pa loke ta trata nan situacion laboral y pa pidi Parlamento pa intermediacion pa nan por haya claridad. E tempo ey nos a haci tur e puntonan conoci na den un reunion cu Minister Lampe den Comision Fiho di Enseñansa y a urgi Minister Lampe pa e presenta su plan concreto pa loke ta trata Landamento Escolar y duna e claridad necesario na e grupo en cuestion. Adicionalmente durante Presupuesto Supletorio nos fraccion a urgi na Minister President pa DRH percura pa e consehonan necesario cu ta pendiente pa loke ta trata nan rechtspositie y contractnan di e instructornan.
Awe despues di un caminda largo, nos por a felicita cada un, y mira cu nos mes wowonan e alegria riba cada uno su cara di por a firma un contrato pa largo tempo cu ta duna mas claridad pa nan trabou y nan futuro pa por sigui educa nos muchanan con pa landa.
