Mike de Meza a pasa Gerlien Croes y Ryçond Do Nascemiento bou di bus sin primi brake. Den e reunion publico di diahuebs dia 16 di maart 2023 ora cu ambos parlamentario di AVP a drenta sala sin informacion total di e caso di ex minister Eddie Briesen y e contractnan firma cu Lee Tofanelli and Associates Inc. (LTA). De Meza a mustra cu tawata un persecucion y cu e no a scohe pa forma parti di esey, y como minister e tempo ey a para e caso di persecucion. OM su carta na e tempo ey minister Otmar Oduber a papia palabra cla, no tin base, ni por medio di e rapport di CAD, ni por medio di Ley di comptabilidad pa persigi e caso. Y cu si ministernan a scohe mes e tempo ey pa hasi esey, no tin un garantia cu nan lo a gana. Es decir cu no ta tin pia pa para riba dje, cual e a cumbini De Meza pa para e caso den su totalidad y hasie irrevocabel. Den entrevistanan e dos parlamentarionan Rycond y Gerlien a divulga nan strategia di fraccion. ‘Nos a palabra den fraccion di AVP cu durante e reunion nos lo enfatisa cu gobierno no por tene man riba cabes di Eddie Briesen y cu Briesen mester duna cuenta y responsabilisa su decisionnan’ sinembargo De Meza cu a tuma e caso over di Otmar Oduber y cu ta tin tur demas documento tawata sa cu e strategia ey no por funciona y a scoge pa laga tur dos bou di bus.
Ta parse cu como De Meza a scohe pa papia e berdad den e reunion y no para cu e strategia di fraccion berde, a trece un kiebro pisa den AVP. Te hasta cu parlamentario Do Nascemiento a exigi pa De Meza pidi disculpa, cual mi ta duda grandemente cu nan lo haya.
E berdad ta cu e contractnan tawata di 2002 bini ariba cu Tofanelli. E benificionan tawata grandi pa pais Aruba. Aruba tawata ricibi pa evento alrededor di 10 miyon florin na entrada y e inversion tawata rond di 10 porciento di esaki. Briesen tabata un victima di persecucion politico di minister Otmar Oduber segun De Meza y e a splica esaki den detayes durante su discurso den parlamento. Si Mepistanan defende Mepistanan bo ta bisa ta normal, pero pa un Avepista defende un minister di MEP cu ya no ta den funcion ta duna bo pa kere cu enberdad Briesen no tawata robes den e caso aki.
Despues di e reunion na varios entrevista De Meza a keda enfatisa y para riba su punto. Asta De Meza a desbarata cu un investigacion ariba Briesen manera tawata e ponencia di su coleganan lo tawata bon. Asina De Meza mes di un forma ta admiti cu e falta di prudencia di Rycond y Gerlien den e caso aki a atacha nan credibilidad y di nan partido. Simplemente pasobra cu nan a drenta sala sin ta documenta completamente y purba na baila riba cabes di Briesen pa rasonnan politico y no veridico.
E ta tristo si pa mira cu ambos parlamentario cu ta hurista, enbes di acepta nan eror, busca e documentonan cu nan tawata falta, lesanan y saca un mihor conclusion, nan ta keda culpa De Meza di a defende Briesen. E lo ta dificil pa kere cu un partido opositor cu si nan ta tin e pruebanan pa por a incrimina un ex minister ta scohe pa keda keto, no bai casacion, hasi e caso irevocabel y mas ainda stop e caso di persecusion contra Briesen asta pa futuro.
E realidad ta esaki, AVP y De Meza no ta tin ningun interes pa scapa Briesen, ta e carta di Ministerio Publico cu a desconseha gobierno sigi cu e caso tawata vital pa para tur cos contra Briesen. E ta tristo si, pa mira dos hoben politico mester a wordo para di e forma aki pa nan mes un colega, cu di un manera masha pisa mes a laganan ripara cu nan mester ta documenta, informa y sin rabia personal contra un contrincante politico. Ta netamente e tipo di politica cu Aruba no ta benificia di dje mas den e epoca aki y mucho menos di hobennan den politica.