Despues cu Minister di Energia, Glenbert Croes a declara cu diahuebs lo firma un acuerdo entre WEB Aruba NV y e compania Eagle LNG, como Presidente di e Comision fiho di Parlamento pa loke ta companianan estatal, lo trata pa e siman aki mes, e comision reuni cu WEB Aruba NV.
Meta di reunion ta pa nos comision fiho por haya tur informacion pa loke ta regarda e acuerdo cu lo wordo firma cu Eagle LNG. Mi persona den calidad di Presidente di e Comision fiho pa companianan estatal, lo manda un invitacion pa representantenan di WEB pa nos por haya tur informacion riba locual Minister Glenbert Croes den nomber di gobierno, a informa ba comunidad den su conferencia diamars ultimo.
Lo nos kier trata e firmamento cu Eagle LNG, kico esaki ta nifica pa WEB, kico e ta nifica pa Aruba, si esaki lo baha prijs di awa y coriente, of si esaki lo wanta e prijs igual y kico lo bay ta e cambionan primordial cu nos ta bay mira como pais.
Na mes momento ta bon pa nos haya sa kico ta e detayesnan den e acuerdo y con esaki lo avansa nos economia den e tempo nos dilanti. Mas cu claro nos sa cu e proceso aki a bini ta tuma hopi tempo, y cu e compania a pasa un screening adecua y tin tur e rekesitonan necesario pa concretisa e proyecto aki.
Nos lo purba tambe pa haya un reunion cu e representantenan e siman aki, cu lo ta na Aruba manera por a comprende. Pa asina haya sa mas di e proyecto pa por comparti cu comunidad en general.
Nos di Parlamento ta haciendo nos parti, nos ta haciendo nos trabou pa keda na altura di tur e desaroyonan andando y asina mantene e transparencia necesario entre Gobierno y Parlamento y comunidad. Di e forma aki pueblo por keda na altura di tur loke ta tumando luga den desaroyonan nobo pa pais Aruba.
Eagle LNG riba su mes ta trata di un desaroyo positivo y esaki lo por nifica tambe un oportunidadnan nobo pa refineria, y un oportunidad pa un crecemento economico pa pariba di brug, cual ta mustra di ta mas cerca di wordo concretisa cu e acuerdo aki.
Na mes momento tur loke cu por ta positivo pa Aruba den e pandemia cu nos pais ta pasando aden, nos fraccion di MEP lo apoya y kier mira esakinan wordo concretisa. Tur desaroyo positivo cu tuma lugar, lo ta un granito di apoyo pa mas liher tur cos por cuminsa normalisa den nos economia y finansas di pais Aruba, pa mama y tatanan di famia por ta bek na pia di trabou atrobe,” Parlamentario di fraccion di MEP, Hendrik Tevreden a declara.