Un di e baluartenan di nos pais sr. Rudi Plaate resientemente a kumpli e bunita edat di 84 aña di edat. Den luna di desèmber 2020 Parlamentario Hato a manda un karta na Minister Croes kaminda e ta hasi petishon pa duna rekonosementu na e baluarte aki di nos pais poniendo un plenchi, rotònde òf kaya na su nòmber. Awe nos ta na luna di mart 2021 i te ainda nos no a haña ni un kontesta ni a tende di Minister si e petishon lo ser honra si òf no. Sr. Plaate a aportá engrande na desaroyo musikal di nos hubentut dor di yuda lanta e agrupashon musikal hubenil mas konosí den nos pais ku ta Las Perlitas. Sr. Plaate a destaká komo: kantante, kompositor, musikante, agrikultor, komersiante, dirigente musikal, kanta-outhor i promotor di balornan patriótiko.
Mirando tur loke sr Plaate a hasi, resientemente meresidamente a presentá un dokumental tokante di su bida i su logronan ku e nòmber “Atardi” refiriendo na e kantika mundialmente konosí ku e mes a komponé. Nos sa ku nos ta mei mei di un kampaña pa elekshon pero gobernashon ta kontinuashon i asuntunan koriente mester ser atendé. Bunita ta pa duna e persona rekonosementu na bida i no warda te na e momento ku e mes no tei mas. Teniendo kuenta ku e edat di nos baluarte sr. Rudi Plaate mi ta kere ku ta na su lugá pa mas pronto posibel gobièrnu dun’e e rekonosementu ku e meresé. Palabra ta na Minister señor Steven Croes.
