Parlamentario Gerlien Croes “September a habri Aruba sin presupuesto y sin gobierno

Un otro September ta habri Aruba sin un presupuesto y ya ta mas cu 2 luna cu Aruba a sali for di cas pa bay urna electoral.

Un proceso y un resultado di eleccion cu a conoce hopi discrepancia y cu a trece hopi discordia y a hasta laga un imagen robes atras di e forma cu nos ta biba democracia na nos pais. 

Mientras cu pais bisiña Corsou no a duda ningun momento pa duna su pueblo e oportunidad di controla e ‘stembiljetnan’ den momento di duda, aki na Aruba un etiket di AVP a wordo colga na cada yamada pa transparencia y derecho di cuidadano y finalmente un resultado di eleccion cu ta duna pa promer biaha den historia oposicion e sosten mayoritario.

Mientrastanto e deseo di partidonan nobo pa goberna Aruba ta refleha grandemente den e proceso encamina ultimo simannan pa cu formacion di gobierno y reparticion di carteranan. Cumprando tempo pa por paga tur candela interno y mantene tur hende contento mientras cu Aruba ta keda carece di plan, vision y un presupuesto cu ta crucial den momentonan aki di crisis y COHO. 

Un presupuesto 2021 recien aproba pa e mesun gobierno cu a prepare, conoci como esun di mas integro den historia di Aruba, basa riba cifranan y calculacionnan di aña 2020, den otro palabra “absoluut achterhaald”.

Awor ya caba nos ta drentando fase final di 2021 y manera prescribi den nos Staatsregeling, dia 1 di September tabata e fecha di entrega di un presupuesto nobo pa Aruba, esta presupuesto 2022 cu sigur un di e presupuestonan di mas importante pa historia di Aruba.

Un presupuesto na unda cu pa promer bes Aruba ta presupuesta un maneho fiha dor di Hulanda cu Aruba mes lo mester paga pa ehecuta.

E ausencia di plannan y ehecucion di un maneho fiho pa Aruba actualmente, ta haci e sentimento di incertitumbre cu pueblo ta bibando aden, dia pa dia mas pio.

No tin perspectiva, combina c’un falta di conocemento y ignorancia  cu tin nos economia den un situacion dia pa dia mas precario.

Entretanto, no por kita for di bista tampoco e yamadanan continuo internacional di Nacionnan Uni riba e forma di procede di Hulanda pa cu e ayudo financiero y acuerdonan pa cu COHO y Landspakket y alabes  e declaracionan di Secretario di Estado Hulandes riba Aruba su cooperacion continuo, pa cu tur acuerdo poni riba mesa.

Preocupante ta e situacion na nos pais, sin presupuesto, sin gobierno, den Crisis cu COHO. 

Ta di lamenta cu Parlamento no a ricibi ni un ahustacion pa locual tabata e presupuesto 2021 despues di a mira recuperacion mas rapido di turismo cu a premira  y na e momento aki atrobe no ta inicia un ciclo presupuestario nobo na tempo pa por tin miho hustificacion di e gastonan di pais Aruba.