Dia 26 di april 2021, Ombudsman di Sint Maarten a entrega un peticion na Hof
Constitucional di Sint Maarten, pa asina huzga constitucionalmente si e 3 leynan
cu gobierno di Sint Maarten a introduci pa cu e cortamente den salario di
ambtenaarnan, e normanan y cambionan den condicionan di trabou di e
entidadnan di sector (semi) publico y tambe pa esnan den un funcion politico, ta
contra derechonan constitucional of no.
Hof a declara e peticion admisibel y dia 1 di november ultimo Hof a duna un
sentencia. En corto, por conclui cu despues di analisa entro otro e
proporcionalidad di e decisionan tuma door di gobierno di Sint Maarten pa cu e
cortamento y cambionan proponi den e leynan, Hof ta considera cu e interes
general ta bay prome y cu e decisionan aki no ta inconstitucional, cu otro palabra
nan no ta contra e derechonan fundamental di cuidadanonan te na momentonan
aki ainda.
En principio lo por bisa un caso importante pa tur 3 isla cu ta afecta y ta carga e
tarea pa ehecuta un landspakket. PERO, mas importante e caso aki a resulta di ta
pa e pueblo di Aruba, na momento cu den e argumentacion, gobierno di Aruba ta
wordo desenmascara completamente! Pagina 18 di e sentencia ta verifica cu e
porcentahe di 12.5% pa cortamento den salario a wordo presenta/proponi pa
Land Aruba (Gobierno di Aruba) y despues Hulanda a condiciona esaki pa tur 3
isla. Den otro palabra, Gobierno di Aruba a mara su mes y mara Curacao y Sint
Maarten tambe na un 12.5%, sin pensa y considera kiko esaki lo nifica pa cada un
pais.
Un bofta den cara di pueblo di Aruba, cu a wordo bisa pa 20 luna largo cu Hulanda
a bin cu e medidanan aki y cu Aruba mester cumpli. Un desastre ta e realidad
amargo cu Aruba ta pasando aden como resultado di decisionan incapacita y
tampoco substancia, cu a wordo tuma na inicio di e Pandemia.
Algun dia atras a enfrenta gobierno cu e hecho cu nan a entrega un rapport di
PWC na fin di 2019 y despues un bezuinigingsplan dia 1 di juni 2020 como
proposicion pa corta den salubridad. Esaki a wordo hasi sin tin ningun conseho y
idea di con lo bai ehecuta e plan di medidanan aki. Blunder tras di blunder y ainda
e lista no a termina. Hecho ta, cu pais Aruba no lo saca su mes na e forma aki for
di e situacion cu e ta y mas aun lo mester cuestiona con esnan cu na e forma aki a
“negocia” cu Hulanda lo ta esunan cu lo soluciona e retonan mas grandi ainda cu
nos tur ta premira.
