ORANJESTAD, Aruba
Parlamentario Endy Croes practikamente den casi tur conferencia di prensa publicamente ta pidi pueblo e pasenshi, comprension y disciplina pa nos pasa door di e momentonan dificil aki.
/// Covid 19 no a caba y si nos no cuida e ta gara nos di sorpresa bek:
Aruba desde 13 di Maart tambe a wordo afecta pa corona crisis aunke mester bisa cu un tremendo trabou a wordo hasi door di henter e Team y desicionnan clave na tempo cu Minister President cu e Team a tuma y a para pa nan cual a garantisa cu Aruba den corto tempo a jega na 0 caso bek. Sinembargo nos economia a sufri un impacto gigantesco. Poko poko cu hopi protocol a cuminsa habri frontera bek cual a duna resultado cu nos turismo ta respirando atrobe y asina a jump start nos economia. Nos ta suplika nos propio hendenen pa mantene disciplina y practika e protocolnan cu ta rekeri. Mantene 1.5 meter di distancia, laba man cada rato, bisti mondkapjes y sigui reglanan establesi. Nos a tuma nota cu ultimo dianan tabata tin transmicion lokal cual ta bira peligroso. E virus ta violento y por multiplica hopi rapido. Tambe a nota nos hendenan gosando primordialmente fin di siman den oranan di anochi cu menos precuasion. Resultado cu Covid a cuminsa lanta cabez bek. Covid 19 ainda no tin un cura pe. Pa nos savalguardia nos pais nos mester duna e ehempel. Klaro algun negoshi lo sufri mas cu otro pero no tin plaka pa cumpra of paga pa e salud di e ser humano cual mester ta na promer lugar. Mi plegaria un biaha mas pueblo, ban mustra disciplina, ban mustra respet pa reglanan establesi, ban cada un duna di su parti pa nos por gana e bataya aki sin mester bay bek na Shelter in Place of Lock down. Nos tin e confiansa den cada un di boso. Ban duna di nos parti.