A logra cambionan elegante pa salvaguardia nos autonomia y reconstrui nos pais
Parlamentario Endy Croes ta cuminsa na felicita Evelyn Wever Croes cu e cambionan elegante logra durante e trayecto di negosacion desde 10 di Juli pa cu 13 di November 2020. E cambionan aki a garantisa cu Aruba a savalguardia su autonomia. Un parti hopi importante ta e artikel nobo den e Rijkswet Entiteit (COHO), cual ta un cambio cu nos a bringa pe , y a wordo agrega den e Rijkswet cu ta stipula como lo siguiente: “Bij de uitoefenen van taken, bedoeld in het eerste lid, kan het COHO ( antes nomber di entiteit tabata CHE), geen landsbevoegdheden uitoefenen die op grond van het landsrecht van Aruba aan een overheidsorgaan toekomen.” Pues Lid nobo aki cu a wordo aloka den artikel 4 di e Rijkswet ta garantisa e autonomia di Aruba cual tanto nos a lucha pe. Pabien Evelyn Wever Croes, pabien na Xiomara Maduro y henter e team negociador.
/// Aruba mester cumpli si cu compromisonan:
Hulanda ta boga pa reforme ( esta hervorming) y Aruba desde 2018 a inicia e trayecto por ehempel cu reforme fiscal. Kisas hopi no a compronde e momento ey e rumbo cu nos mester bay. Pues reforme ta algo cu Aruba tambe ta desea y ta algo cu nos sa cu mester tuma lugar. Den e landspakketten tin ankra un cantidad di reforme. Mas cu klaro nos lo cuminsa un trayecto awor cu mucho mas velocidad pa hunto nos por logra pasa door di e proceso di e reformenan pa den futuro por tin un Aruba solido y fuerte. Kisas e trayecto aki na caminda lo por tin partinan poko “zuur” pa algun hende of pa algun departamento pero ta un proceso cu nos mester pasa door di dije. Berdad tambe ta cu nos no por keda hasi mesun cosnan pa 50 aña largo y expect mihor resultado. Pesey ta pidi cooperacion di tur hende pa nos encamina esaki hunto.
/// Dollarisacion:
Por ehempel den Landspakketten tambe a sigñala cu Aruba lo mester bay over di florin pa dollar Americano. Durante negosacionan a logra combense Hulanda cu aki lo mester hasi un investigacion cu expertonan promer y depende resultado di dicho investigacion lo tuma un desicion final. Hulanda a bay di acuerdo cu esaki.
/// Pensioen:
Den Landspakketten Hulanda a menciona cu edad di pensioen lo mester aumenta mesora pa 67 aña. Berdad ta cu Parlamento a haña recien un presentacion di SVB unda cifras nan ta mustra cu e fondo aki lo core peliger si nada wordo hasi. Tin mas cu 21000 pensionado actual y no tin suficiente hende trahando pa por sostene y carga e fondo aki. Tambe cifras ta indica cu nos hendenan pa averahe awor ta biba mas largo. Hulanda sinembargo a bay di acuerdo pa no aumenta e edad di pensioen awor mesora manera e idea tabata na inicio y a bay di acuerdo pa aumenta esaki na 66 aña na 2025 pero almismo momento a duna Aruba e libertad pa promer cu hasi esaki lo evalua e solides di e fondo regularmente y si gobierno por tin otro alternativa tambe lo considera esey promer cu cualkier desicion final.
/// Peticion na henter comunidad ban carga esaki hunto:
Pesey mes Parlamentario Endy Croes ta hasi un apelacion na tur pero tur instancianan, departamentonan y pueblo henter pa ban carga esaki hunto. Esaki lo bay garantisa un mihor futuro pa Bo juinan cu kisas awe ta chiquito. Ban no pensa solamente riba nos mes pero mas bien ban pensa riba e pais cu nos kier construi desde awe pa futuro unda nos lo laga un mihor Aruba atras. Un Aruba solido y fuerte cu oportunidad alentador y igual continuo pa nos juinan y nos futuro generacion. Trahando cu tur nanishi den mesun direcion nos lo logra cosnan grandi pa e pais aki.
