ORANJESTAD, Aruba
Parlamentario Endy Croes a felicita Aruba Voetbal Bond den su totalidad pero sigur su presidente Richard Dijkhoff kende a tuma e antorcha over for di e maestro Rufo Kelly, e ex presidente di AVB kende a inicia e proyecto aki y unda finalmente por a presencia e realisacion di su vision. Danki Rufo Kelly pa su vision y Danki Richard Dijkhoff y staff pa cristalisa esaki y sigur danki na FIFA y CONCACAF pa financia y sostene e proyecto aki.
Academia di futbol
Diahuebs ultimo den oranan di mainta Parlamentario Endy Croes como Presidente di comision fiho di deporte y cultura den Parlamento a ricibi Jason Roberts Director of Development di CONCACAF, Marlon Glean Regional Manager di FIFA, Etienne Siliee Coaching License Instructor di CONCACAF hunto cu Directiva di AVB. Un reunion hopi informativo unda tanto FIFA y CONCACAF a mustra nan compromiso total cu Aruba y a expresa cu nan ta cla pa inverti y desaroya futbol pa un otro nivel creando e plataforma corecto pa esaki brindando oportunidad real na nos atletanan hoben. Cuminsando cu e Academia di futbol esta “Talent Academies” te na prepara nos infrastructura. Aruba tin talento y awor mester e structura mas profesional di cual nan lo sostene financieramente mediante un Academia di Futbol pa den futuro logra mira nos talentonan yega mucho mas leu.
FIFA cu 6.1 miyon florin pa yuda Aruba
Banda di esaki a splica Parlamento di fondonan cu FIFA tin disponibel pa infrastructura pa Aruba. Mester un stadion “match stadium” cu ta cumpli bek cu FIFA standard pa Aruba por hunga su weganan local na cas (awor esaki no ta asina), y banda di esaki nan ta dispuesto pa inverti den algun community facilities. FIFA tin 6.1 miyon florin reserva pa yuda Aruba y den acuerdo cu AVB y cu e compromiso di gobierno bou cierto regla y exigencia standard lo cuminsa inverti parti di e suma aki den 2020 na Aruba. Pues e Team Gobierno di Aruba, Aruba Voetbal Bond y FIFA/CONCACAF lo mester traha hunto y hopi di cerca pa logra esaki. Parlamento ta sostene e plannan aki den su totalidad.
Un Bus special di AVB
Den oranan di atardi Parlamentario Endy Croes a atende e ceremonia inaugural na Compleho Frans Figaroa unda a lansa oficialmente e Academia di Futbol di AVB den presencia di representantenan di FIFA, CONCACAF, AVB y un cantidad di invitadonan. E Plan aki lo concentra riba muchanan di U13 y U15 unda un bus special cu AVB a adkeri lo busca e talentonan aki despues di scol y hiba nan stadion, haci huiswerk, come y train un cantidad di ora den atardi cu un team di coach certifica pa CONCACAF y despues e bus lo pasa baha e atletanan hoben aki bek na cas.
Parlamentario Endy Croes a ricibi exemplar di e “Project Plan Talent Academies 2020-2024” pa cu e Academia di Futbol aki. Mesora a combersa cu minister Danqui Oduber pa hunto entre Gobierno y Parlamento duna e atencion y sosten total na Aruba Voetbal Bond pa por logra cristalisa e inversionnan cu FIFA tin reserva destina pa Aruba pa e proyectonan di infrastructura. Reunionnan cu AVB lo continua pa hunto yega na e plan desea y sostenibel. Sin duda cu deporte “sin” ningun ayudo di Lotto pa Deporte ta progresando.
Parlamentario Endy Croes a termina felicitando AVB, FIFA y CONCACAF y tur cu tras di cortina a aporta duro na un of otro manera pa realisa e proyecto bunita aki. Pabien. Hunto pa Aruba!
