cu nan derecho of no pa asina determina ken ta sigui y ken no lo sigui aporta na e caha di solaridad. Desde cu mundo henter ta den un lock di e Pandemia e bida y economia di tur pais a cambia. Di acuerdo cu consehonan di expertonan riba dicho tereno gobierno(nan) rond mundo ta tuma cierto medidanan pa preveni cu demaciado hende ta wordo contagia hunto unda no por jega e punto cu no brinda e cuido pa salud. Ningun pais kier pasa aden lokual Italia y Spaña por ehempel a pasa aden na inicio unda mestewr a escohe pa trata esnan bou 60 aña y laga esnan mas di 60 aña pena, ansha y fayese paso no tabata tin mas cama y ventilators.
Kiko ta e consecuencianan di Covid 19:
Den rapport di Standard & Poors di April 2020 Aruba a sali e pais mas tanto afecta economicamente y financieramente den 122 pais cu a wordo investiga. Mas cu klaro esaki a ilustra con debil Aruba por ta como cu nos ta draai 80% solamente di un pilar esta turismo. Consecuentemente masha hopi hende a wordo afecta directamente unda alrededor di 4000 a perde nan trabou y 21000 persona a keda na trabou pero door cu gobierno ta subsidia nan salaris cu 60% y si no ta pa e desicion aki Aruba lo a crash unda miles y miles di hende lo a perde trabou den un solo tiro. Hulanda ta sostene e parti aki door di duna lening na 0% esta Liquiditeits Steun cual Aruba mester cuminsa paga bek na April 2022. Pa e proyecto di FASE unda gobierno ta sostene alrededor 4000 mama y tata di famia cu a perde trabou esaki ta bini di entre otro e plaka empleadonan publico y esnan di companianan estatal ta enregando esta 12.6% di empleadonan publico y companianan estatal y 25% di entrada di Ministernan y Parlamentarionan.
Crisis sin presidencia:
Nos ta mei mei di un crisis sin presidencia. Un Virus cu ta mutuando birando mas agresivo y mas peligroso. Un Aruba cu ta purbando di mantene su halanan habri pa turismo cu masha hopi protocol pa purba tin un economia na awa di bida. E siman aki nos a scucha nos Arubianonan cuminsa cu un discusion entre diferente companianan estatal, y sindicatonan kendenan si ta sigui entrega, kendenan No ta bay coopera mas y no lo entrega mas y si mester kita “cachi cachi” di salario di nan lo consulta Hues of hasta por spera accion. Como Parlamentario responsabel cu ta pasa ta yuda un centenares di cuidadano tur santo dia, mi a puntra mi mes. Esaki ta e Aruba cu nos antepasadonan a construi? Esaki ta e Aruba cu Betico Croes a lucha pe? Materialismo enberdad a vense Idealismo? Unda nos sentido pa nos rumannan cu ta sin salario pasando un etapa scur den nan bida a keda? Berdad nos mester bay bringa cu otro ken si ta entrega y ken no mester entrega? Parlamentario Endy Croes kier laga esaki atras como reflecion. Sinta na cas den ceno familiar y puntra Bo mes con esnan cu mester paga awa, coriente, huur, alimentacion, school, transporte pa juinan bay school pa nombra algun gasto ta bibando cu Afl.950 di FASE ? Pone nos mes den nan stoel un rato. Kiko tur ta e sacrificio di e personanan aki? 21000 empleado den sector priva a bay atras 40% den salaris y ta bibando di 60% cu gobierno ta subsidiando. Gruponan grandi manera musiconan afecta incondicionalmente door di covid 19 pa duna ehempel. Un total di 390 MIYON a wordo inverti den esakinan den 2020. Pregunta ta: Berdad nos NO por ta solidario cu 12.6%. Cada cuidadano contesta esaki di su curason.
