ORANJESTAD, Aruba
Durante ultimo reunion den Parlamento unda a trata negosacionnan cu Hulanda Parlamentario Endy Croes a repasa un poko di historia di e gran Lider Nelson Mandela kende porcierto a wordo encarcela 27 aña inhusto como cu e tabata bringando pa un causa noble.
/// Nelson Mandela wordo sera pa 27 aña:
Nelson Mandela tabata un abogado kende a subi lista politico desde 1943 y a hiba un lucha contra colonialismo y apartheid. Nelson Mandela a hiba su lucha contra segregacion( apartheid) unda gobierno e tempo aya mediante ley solamente hende color blanco den minoria tabata goberna South Africa. Nelson su lucha tabata pa igualdad, respet y e derecho di hendenan di color. Su ideal y soño ta pa logra un sociedad liber y democratico unda tur hende por biba hunto den harmonia cu oportunidadnan igual den bida. Asina Nelson Mandela a comberti su mes den e Lider cu mas influencia di siglo XXI. Den su trajecto el a wordo deteni y sera na1961 pa presunto tracion door di su opositornan. Na 1962 nan a bolbe sere pa a bandona South Africa illegal. Na 1964 finalmente nan a condene na cadena perpetua acusando Mandela di conspiracion pa su protestanan cu e tabata hasi. Na 1985 momento e tin 21 aña den prison Presidente Botha a ofrese su Libertad condiciona cu e ta renucia participacion den politica cual Nelson Mandela a nenga categoricamente. Su reacion: Solamente hendenan liber por negosha. El a prefera nenga su Libertad cu condicion y a escoge pa permanese sera. Februari 1990 despues di 27 aña den prison sera inhusto pa hiba un lucha husto Nelson Mandela a recobra su Libertad.
/// Nelson Mandela na 1994 a bira e promer Presidente di color:
Despues cu Nelson Mandela a sali di prison el a recore South Africa hibando su mensahe dilanti multitudnan grandi. Libertad-Democracia y Union tabata su motto. El a logra unifica aliadonan, opositornan y hasta enemigonan. Nunca e tabata huy of core pa scucha personanan cu tabata tin un pensamento distinto como cu Nelson Mandela semper ta kere den dialogo. Den bida el a siña conose e importancia di tolerancia y dialogo. Na 1993 el a wordo reconosi cu un Premio Nobel de la Paz! Na Mei 1994 cu 63% votonan democratico el a logra bira e promer Presidente di color di South Africa. Lesnan di bida segun Nelson Mandela manera venganza, provocasion, instigacion, exitacion no ta aporta na un lucha sino concilacion, inteligencia, dialogo y tolerancia.
/// Hulanda cu un trato inhusto pa Aruba-Curacao-St Maarten:
Parlamentario Endy Croes a splika den Parlamento cu e storia tras di Nelson Mandela ta pa ilustra con un Lider hibando un lucha husto ta wordo benta den prison y sera pa 27 aña largo na un manera “INHUSTO”. Tambe a splika cu Na Inglaterra den Wembley Staduim na 1988 tabata tin un concierto “Free Nelson Mandela” cu artistanan di taya kendenan a perform gratuitamente . Pues un concierto pa un causa husto. Hulanda publicamente a sostene e concierto aki y a apoya esaki pa un causa husto. Ta di aprecia tur e paisnan rond mundo cu a duna sosten na e lucha aki. Pesey awe Parlamentario Endy Croes no por compronde e postura di Hulanda mei mei di un Pandemia kier pone condicionnan asina pisa y fuerte pa presta Aruba plaka bou di Rijkswet cu nan no kier laga ni Raad van Staten duna su opinion legal riba dije. Tampoko kier a laga Parlamento ni lesa esaki inicialmente. Pakiko un trato asina? Nos ta acepta cu nos mester ayudo “temporal”. Nos ta acepta y ta di acuerdo cu reforme ( hervorming). Aruba nunka a cay den default pa cu su debenan externo. Esaki no lo ta diferente. Ta presta nos ta presta y klaro cu Bo por supervisa y controla. E manera con Hulanda kier hasi esaki ta na un manera inhusto. No castigami y no castiga Aruba na un manera inhusto mescos South Africa a hasi cu Nelson Mandela. Pues cu dialogo, sinceridad y curasonnan na e lugar corecto nos mester por sali di e enfase aki. No trapa nos libertad y felicidad di un pueblo humilde y chiquito. Spera cu e historia di Nelson Mandela por ta un reflecion pa Hulanda pa e negosacionnan andando.
