ORANJESTAD,Aruba
Parlamentario Endy Croes ta contento di por a tende pa promer biaha den historia cu CAFT tabatin palabranan di compliment pa e gobierno actual. Mas cu claro tin cierto preocupacionnan menor manera presupuesto cu nan lo a desea di tabata aproba pero den liña grandi a expresa e palabra compliment den Parlamento. E unico 3 Parlamentarionan di AVP kendenan tabata presente tabata Marlon Sneek, Richard Arends y Mervin Wyatt Ras. Dado momento e parlamentarionan aki di AVP ta bin reunion cu e mesun animo cu cierto prensanan cumpra y liga na AVP cu e solo meta cu nan lo kier tende cu Aruba lo wordo someti na un KB. Esey aparentemente lo haci nan masha feliz. E biaha aki atrobe tanto e Parlamentarionan di AVP como cierto prensanan cumpra lembedo di Hulandes a keda cu nan gana.
AVP cu deseo pa Aruba haya un KB
Parlamentario Endy Croes ta splica di no por compronde con un Arubiano cu sa masha bon e desaster financiero y Mega Debe cu AVP a orkestra y e situacion dificil cu e gobierno aki a encontra Aruba aden ainda por tin e afan y cierto orguyo pa por tende di CAFT cu Aruba den 2020 lo mester haya un KB? Dos KB ta existi te cu awe den historia, uno pa Watty Vos (dfm) lesa rapport Koerten 1994 y e AVP-istanan lo compronde con Henny Eman a traiciona Watty Vos pidiendo en persona Hulanda pa pone un KB riba Watty. E di dos KB a bin na 2014 riba cabes di Mike Eman momento cu “cheersleadernan di AVP” esta e Parlamentarionan di AVP den luna di mei 2014 a aproba un presupuesto pa e aña ey, pues super laat cu un deficit di 444 miyon florin. Wel e gobierno actual a logra den apenas algun aña draai bek e desaster di Mike Eman y e deficit di 444 miyon te cu 4 miyon na final di 2019.
Surplus chikito na 2019
Locual a sorpresa Parlamentarionan di AVP mas aun y a haci nan hopi mas dolor ta momento cu Raymond Gradus a splica cu awor cu cifranan final di 2019 a drenta incluyendo october te cu december 2019 a resulta cu Aruba a conoce un SURPLUS chikito. Pues enbes di un deficit di 25 miyon florin ancra den protocol 2018 Aruba ya na 2019 a conoce un SURPLUS y pa 2020 mester alcansa 25 miyon Surplus. Gradus mes a splica cu finalmente awor cu nos a yega Surplus, Aruba por cuminsa paga e debenan di Mike Eman. Den protocol tin ancra cu e debe nacional orkestra pa Mike Eman y AVP lo alcansa 50% te na aña 2039.
Compliment a haci AVP hopi dolor
Mientras e proyectonan PPP di AVP e pueblo aki lo caba di paga te na 2044. Esaki ta e realidad. CAFT a accentua tambe pa gobierno keda enfoca pa baha e gastonan di gobierno. Tanto AZV y SVB tabata puntonan cu mester atencion di acuerdo cu CAFT. Tur cu tur e compliment di CAFT den direccion di gobierno actual aparentemente a haci AVP hopi dolor. Esaki ta muestra si cu nos tin un Minister di Finansas y un Minister Presidente cu mester tur elogio di mundo na e manera cu nan ta atendiendo cu finansas di nos pais garantisando un mihor porvenir pa nos futuro generacion. Un cos ta sigur, nunca pero nunca mas por duna AVP un voto di confiansa.
