Parlamentario Endy Croes ta transmiti e precupacion di pueblo directamente pa Ministerio Publico pa asina nan por bini dilanti y duna un update di lokual ta andando. Pueblo ta demaciado precupa cu casonan nan gran escala di corupcion di AVP. Mientrastanto dianan ta bay ta pasando sin cu pueblo mes ta tende algo y ta crea impresion cu Ministerio Publico lo a “freeze” e casonan aki.
Benny Sevinger a coopera pa benta di mas di 25 miyon na tereno di pueblo
Manera ta conosi desde Februari 2018 dentro di 3 luna cu e gobierno nobo a sinta a percura pa acumula masha hopi prueba alrespecto corupcion y fraude cu benta di terenonan esta patrimonio di pueblo cual a tuma lugar durante 8 aña di AVP. Pues no solamente AVP a kibra Aruba financieramente prestanto mas di 2200 miyon florin pa sera deficit durante 8 aña largo pero su Ministersnan entre otro Benny Sevinger a mal usa su funcion como x minister facilitando y colaborando pa amigonan bende opties riba tereno mediante un constructie di Shares di N.V’s . Hasta tin a wordo bende promer cu e NV a lanta mes. Mas di 25 miyon ta den wega riba e construcion aki. Ministerio Publico a drenta cas di Benny Sevinger x minister di AVP y Leoncita di Canal 90 dia 1 di october 2019. Desde eynan pueblo no a ricibi mucho informacion mas. Pa e rason aki pueblo a cuminsa bira mas precupa y ta expresa nan mes publicamente tur dia contra Ministerio Publico. Pueblo ta precupa cu por tin podernan politico cu ta tranca e investigacionnan aki. Parlamentario Endy Croes ta keda splika pueblo cu e proceso aki berdad a tuma mas tempo di lo normal pero cu Ministerio Publico ta trahando riba e casonan aki. Kisas ta bon pa Ministerio Publico mes bin dilanti y brinda pueblo e transparencia nesesario cu poko informacion.
Benny no por scapa di lokual el a hasi:
Parlamentario Croes ta recorda dia 1 di Otober 2019 durante oranan di mainta momento cu Ministerio Publico a drenta cas di Benny Sevinger, Staten tabata tin un reunion den Parlamento na e mesun momentonan ey. Benny klaro no tabata presente. Pero frapante ta con Robert Candelaria un x Polis di halto rango a core bandona reunion pa bay duna Benny sosten y guia Benny kiko pa papia y kiko pa no mag di bisa Ministerio Publico. Bueno no a spera otro di Robert Candelaria como cu e tambe a djodjo cu plaka di pueblo. E tambe na 4 ocasion a laga Mike Eman paga su ticket di Corsow pa Aruba cu plaka di pais Aruba pa asina bin negosha su number riba lista di AVP. Te hasta a mara esaki na un funcion di Director di Scheepsvaart di Afl. 20 mil pa luna cual e gobierno nobo mester a “fluit terug”. Finalmente e contenido di e investigacion berdaderante ta uno hopi grandi. Por a compronde cu Ministerio Publico a consulta tanto na Corsow, Panama, Colombia y Miami unda aparentemente e sumanan grandi di plaka di benta di terenonan tabata move. Tin asina tanto prueba di entre otro “valsheid ingeschrifte” di cual Benny ta wordo culpa pe cu segun fuente Benny no por scapa. Mike Eman tambe a ricibi transferencianan di 50 mil us dollars promer cu elecion y tambe mester duna cuenta riba e transacionnan ricibi di plaka preto. Pues pueblo ta enespera y pendiente pa e dia cu Mike Eman y Benny Sevinger di AVP mester duna cuenta y splika nan rol den henter e procesonan di Fraude y Corupcion na gran escala cu tereno nan di pais Aruba y tranferencianan dudoso.
