Parlamentario Endy Croes a splika cu desde inicio di November el a bin ta splika cu promer cu aña termina Aruba lo haña un noticia alentador positivo cual ta crea hopi speransa pa nos por drenta un aña 2021 prospero. Ta un secreto publico cu aña 2020 tabata e aña di mas malo den historia di Aruba causa door di Covid 19. Pero cu un gobierno y un Promer Minister trahando duro y sin sosiego esaki a trese cune cu poko poko pero sigur nos ta mira e luz na horizonte ta cuminsa briya.
Dialuna a anucia e ganadornan Quanten LLC y Eagle LNG :
Dialuna ultimo Promer Minister Evelyn Wever Croes tabata den Parlamento hunto cu e Advisory Board pa asina brinda Parlamento di e “status” di e destaho publico cual a inicia desde mei 2020 alrespecto e refineria. Den e proceso aki e recomendacion final di e Advisory Board a resulta den 2 compania esta e compania Quanten LLC di USA y tambe Eagle LNG tambe di USA. Ambos compania ta goza di e “advocacy” di gobierno Americano y esaki personalmente den un bishita di Consul Americano na Aruba a wordo confirma. Momento cu gobierno Americano ta “advocacy” un compania Americano esaki kiermeen cu nan a wordo “gescreen” pa gobierno Americano y cu nan tin e placa cu nan ta bisa cu nan tin y ta trata di plaka limpi sin ningun problema cu por wordo inverti cu “back up”di gobierno Americano.
Quanten LLC cu 3.5 Biyon dollar y Eagle LNG cu inversion di 185 miyon:
Quanten LLC den nan “binded proposal” a duna indicasion cu nan ta “ok” pa hasi un inversion di 3.5 miyon US dollar mientras e inversion di Eagle LNG ta trata di un inversion di 185 miyon dollar. Pa lokual ta Eagle LNG ta trata di un proyecto separa unda lo construi un planta di gas. Pa esaki Eagle LNG mester un contracto cu WEB promer pa por realisa e proyecto aki. Asina por logra pone WEB draai mas limpi riba gas cual por condusi na un rabaho substancial di prijs di awa y coriente di “minimo” 10% pa henter comunidad. Lokual ta trata refineria e consorsio di companianan moderno cu technologianan super moderno lidera pa Quanten LLC ta den e posicion awor pa firma un Letter of intent cu RDA/ Gobierno pa cuminsa negosacionnan di imediato pa un contracto final. Esaki por dura rond 90 dia pa por tin documentonan riba mesa den forma di un contracto pa yega na un acuerdo final cual mester ta un win win situation. Expertonan di Quanten LLC na mas cu un ocasion tabata na Aruba ultimo 2 lunanan y nan interes ta aun mas grandi despues di a inspeciona e refineria den su totalidad. No lo keda na solamente rafina productonan di custumber pero lo converti esaki den un refineria competitivo cu mas productonan entreotro petro chemico tambe. Pues cu bendicion y guia di nos Creador nos ta keda postitivo cu miras pa por yega na sera e contracto final den lunanan nos dilanti.
Un total di 2100 empleado den “peak” mas un cresemento di GDP di 9.3%:
Si tur cos cana di acuerdo cu planning pa final di maart nos por ta asina leew firmando e contracto. Trabounan di “refurbish” lo inicia un corto tempo despues di esaki. Den 2021 esaki lo genera 2000 cupo di trabou cual ta significa tambe un impacto economico di cresemento di GDP di pais Aruba di 9.3%. Lokual ta trata Eagle LNG esaki lo genera 100 cupo di trabou inicialmente. Segun calculacion di Economische Zaken basa riba MARUBA cu ta un systema valida pa IMF pa calcula scenariosnan y hasi prognostico, den aña 2022 si tur cos cana di acuerdo cu e plan e impacto economico lo aumenta na un cresemento di 20% di nos GDP y lo settle na 2023 na 10%. Esaki sigur ta bon noticia. Pues esaki lo yuda Aruba sali hopi mas liher for di e situacion penoso cu nos a experencia despues di e tormenta Mike Eman y awor e Covid 19. Cu pasenshi Fe y perseverancia Aruba lo briya atrobe.
