ORANJESTAD, Aruba
Parlamentario Endy Croes ta splika cu berdaderamente Aruba ta pasando den temponan sumamente dificil. Corona Crisis a percura pa stagna nos economia di tal forma cu ta exigi hopi inteligencia di nos gobernantenan pa logra sali for di esaki. Sinembargo ta di compronde cu esaki a afecta henter mundo y Aruba no lo scapa di dije. Mei mei di tur esaki trabounan mester sigui y nos tin hopi precupacion cu projectonan grandi unda a mara Aruba na averahe 20 aña di pago di sumanan astronimico.
/// Watty Vos Boulevard un projecto den pura na 2017 di AVP:
Parlamentario Croes ta splika cu Aruba a keda mara cu projectonnan PPP cu AVP a sera y pueblo lo mester bay paga pa proximo 20 añanan. Un total di 82.4 miyon a wordo paga na 2019 y e suma aki nos lo sigui page te na 2037. Lokual a acapara atencion ta e calidad di e projecto. Parlamentario Croes a tuma nota cu diferente caminda tin scheur den e voetpadnan banda di caminda y a cuminsa crea hopi duda si e construcion a bay di acuerdo cu e Bestek. Ainda ora masha poko awa jobe ta nota diferente problema. Tipo di projectonan aki a sera un DBFM contract esta un Design Build Finance Mantain contract. Pues gobierno anterior na januari 2017 a sera e contracto aki pa Watty Vos Boulevard. Pueblo lo paga e projecto aki pero ta bale la pena pa controla si lokual pueblo ta paga ta lokual ta firma den e Bestek.
/// Ken a controla e trabou?:
A lanta hopi pregunta y Parlamento tin un trabou pa hasi. No ta mal idea pa hasi un feitenonderzoek como e promer stap. Kende a controla e trabou? Parlamentario Endy Croes a splika cu e siman aki a sali un carta pa Minister di Infrastructura pidiendo un cantidad di documento pa Parlamento por cuminsa cu preparacionnan pa esaki. Entreotro a manda pidi Integral Design Vision, contract DBMF y diferente otro documentonan mas di balor pa Parlamento por cuminsa cu su ronda.
Mesun cos lo mester bay bek ainda pa Green Corrideor y Hospital cu ta projectonan cu a lanta masha hopi pregunta pa e balor di plaka di pueblo cu ta wordo paga pa e projectonan aki. Parlamentario Endy Croes a splika aunke sea nos ta carga cu trabou lo traha espacio adicional cuminsando cu Watty Vos Boulevard. 