ORANJESTAD,Aruba
Parlamentario Endy Croes kier atende un otro problema cu el a bin ta constatando. Despues cu siman pasa a accentua e tardansanan enorme cu tin na momento cu un entrepreneur solicita pa un permiso por ehempel di Koffiehuis, restaurant A of B pa nombra algun na DWJZ, ta un caminda di cruz cu basta burocracia promer cu e ciudadano logra haya un vergunning. Como cu ta 4 diferente departamento ta envolvi, entre otro DWJZ, Polis, Brandweer y DVG y cada un ta traha segun nan agenda cos ta cana demasiado slow. Parlamentario Endy Croes ta den reunion intensivo cu Minister encarga pa asina trece cambionan grandi e proximo lunanan den esaki. Gobierno a declara e aña aki e aña di innovacion y pues via un plataforma digital y instruccionnan concreto den un maneho nobo y “strak” lo mester alivia esaki cu por ehempel den 14 pa 21 dia maximo un ciudadano mester por tin su permiso cla.
Gastonan di notario demasiado halto
Parlamentario Endy Croes a sigui investiga e reclamonan cu ta bin dilanti y a cay riba un otro proceso cu ta trancando nos economia pisa. Desde momento cu un ciudadano kier lanta un NV of VBA te na e momento cu e haya un vestigingsvergunning ta dura por lo menos 4 luna cual ta imposibel pa un pais den desaroyo. Alabes Parlamentario Endy Croes ta accentua cu gastonan di notario ta demasiado caro pa solamente lanta un NV of VBA. Pa lanta un NV of VBA un ciudadano mester cuminsa cana su caminda primeramente via notario. Aki mester haci un cita y presenta pa yena un formulario, paspoort y verklaring di Afl. 10,- di Censo. Prijs na Aruba entre e 4 notarionan ta core entre Afl. 2900 pa Afl.3400,-, solamente pa lanta 1 compania. Parlamentario ta sinti cu esaki ta demasiado caro y por ehempel na Hulanda pa menos cu 500 Euro bo ta lanta un BV, holding of otro compania y hay’e cla inscribi na Kamer van Koophandel den menos di 2 siman. Parlamentario Endy Croes ta splica cu Aruba ta forma parti di Reino Hulandes y ta con ta posibel cu na Aruba tin tanto burocracia asina?
Un caminda di cruz
Ta urgi gobierno pa reuni cu e Notarionan pa yega na un consenso pa un prijs husto of ta obliga Parlamento bin cu un ley pa regula esaki. Banda di paga demasiado placa na Notario e averahe di tempo na Notario ta entre 6 pa 8 siman. Aki mester bisa cu DWJZ ta bolbe hunga un rol unda cu High Commissioner mester tuma un decision riba e nomber cu un ciudadano scoge pa su compania y esaki tambe ta tuma demasiado tempo. Atrobe na Hulanda e ta maximo 2 siman cla inscribi na KvK. Pues aki tambe mester haci un cambio drastico pa mehora nos servicionan cu tin nos economia tranca pa no bisa mata. Despues di esaki e ciudadano mester acudi na Economische Zaken pa solicita pa un vestigings vergunning. Un otro caminda di cruz ta cuminsa cu un tardansa di 8 siman atrobe, anto si bo falta cualkier documento esaki lo surpasa 10 siman.
Mester acelera e proceso pa haya permiso
Pues recapitulando desde lanta un NV of VBA na notario te pa bo por tin un vestigingsvergunning esaki ta tuma minimo 4 luna. Parlamentario Endy Croes ta accentua esaki ta si e departamentonan concerni tin bon beis. Simplemente esaki ta inaceptabel. Programa di gobernacion Hunto pa Aruba 2017-2021 tin stipula: “Gobierno lo aumenta efectividad y eficiencia di servicionan cu sector publico ta brinda na sector priva y lo elimina “red tapes” y tardansa innecesario den proceso di otorgamento di diferente permiso mediante un Ley di Restauracion Economico (Crisis en Herstelwet)”. Esaki hustamente pa acelera procesonan pa diferente tipo di permisonan.
Parlamentario Endy Croes ta pidi gobierno den e aña aki dedica na innovacion, ban dedica tempo pa atrabes di innovacion y digitalisacion por resolve nos problemanan di tardansa y burocracia y brinda e toolsnan necesario pa nos entrepreneurnan por contribui y yuda “spin off” nos economia.