Parlamentario Endy Croes den un conferencia di prensa dialuna mainta a baha cu preguntanan fuerte pa Ministerio Publico. Pa basta tempo pueblo ta reclama cu Ministerio Publico ta traha a la estilo di morocoy. Esaki ta pasobra pueblo a cuminsa perde e confiansa den e aparato Ministerio Publico. Parlamentario Croes ta splica cu momento un pueblo perde confiansa den nan Ministerio Publico ta momento pa bati alarma y busca pa sa kiko ta pasando.
///PG Bote ter Steege y Officier Frans van Duetekom mester ta sincero:
Tin casonan na Aruba cu nunca a wordo resolvi y pa esaki pueblo por tin compresion. Tin casonan durante pandemia unda polisnan a duna boet pero e boetnan aki nunca a wordo procesa door di Ministerio Publico. Aki Ministerio Publico debe pueblo un contesta. Tin casonan di politiconan di AVP bou investigacion cu ta tumando demaciado tempo. Parlamentario Croes a splica cu desde Februari 2018 a entrega un keho oficial contra x minister di AVP esta Benny Sevinger. Ta trata di un caso di corupcion masha masha grandi unda a faborese un grupo di amigo pa gana miyones cu benta di opties riba terenonan comercial via un construcion di bende sharesnan di NV. Alaves tin hopi prueba di masha hopi amigonan cerca di Benny Sevinger cu a hasi uso di e modelo aki. Benny Sevinger a coopera y facilita su amigonan den e presunto corupcion di mas grandi den historia di pais Aruba. Un PG den un pais y un officier van Justitie ta esnan encarga pa investiga y dirigi investigacionnan pa asina pone esnan responsabel dilanti mesa berde. No por ta asina cu despues di mas cu un aña cu Aruba no tabata tin un PG awor a logra atrae un PG Bote ter Steege pero alpareser nada a cambia. Esaki ta e anhelo di pueblo y peticion diario di pueblo pa husticia por cana su camina y funciona. Tur merdia den programanan radial por scucha e decepcion di pueblo den Ministerio Publico. Alaves riba caya tin mesun sentimiento. Parlamentario Endy Croes ta lamenta cu pueblo a perde speransa y confiansa den Ministerio Publico. Ta momento pa e PG bin dilanti y bin duna un update riba diferente casonan. Carga Bo responsabilidad. Ora ta papia di trias politica unda Parlamento ta duna tur siman un update di nan trabou, gobierno tur siman ta brinda informacion na pueblo esta e parti cu ta toca Ministerio Publico tambe kisas no cu mesun frequencia pero mester por duna pueblo cara. Ta keda na PG Bote ter Steege desde awe pa duna cara na pueblo. Nos no mester di vakantieganger. Nos tin mester personanan recto cu curashi cu ta asumi nan responsabilidad na tur momento. Parlamentario Croes a termina bisando cu pa hopi luna e mes a sali na defensa di Ministerio Publico pero berdad no por ta asina cu tin un silencio profundo di Ministerio Publico riba e angustia di pueblo. Palabra awor na Ministerio Publico.