Fraccion di MEP a manda carta oficial pa gobierno pa extende Loon Subsidie y MKB Steun y FASE
Parlamentario Endy Croes a splika cu recientemente Fraccion di MEP a manda un carta pa gobierno pidiendo gobierno e atencion pa cu Loon Subsidie, MKB Steun y FASE. Berdaderamente Covid 19 a sopresa mundo henter y esaki a afecta Aruba su economia barbaramente.
Gobierno mesora a actua brinando ayudo na comunidad:
Manera cu Covid 19 a hasi su entrada na Aruba den luna di maart mesora Gobierno a actua y Parlamento a brinda su aprobacion na un presupuesto cu un deficit di 1300 miyon florin unda mester presta mas di 1000 miyon florin pa cu aña 2020 pa asina brinda sosten na henter nos pueblo. Parlamentario Endy Croes ta lamenta cu AVP a vota contra e presupuesto aki cual ta inclui e alivio y ayudo pa e ser humano. Banda di esaki Gobierno mester a cumpli cu algun condicion di Hulanda pa por yega na prestamonan cuantioso pa por a paga por ehempel Loonsubsidie pa por mantene empleadonan na trabou. Alaves a brinda comercio sosten di Afl.4000 pa kwartal y tambe a crea e programa di FASE pa esnan cu a perde trabou. Pa recapitula te cu October tin ainda 21000 persona cobrando Loonsubsidie y esaki a alkansa un suma di 215.5 miyon florin. Tambe un total di averahe 1800 compania a cobra e ayudo di MKB steun esta Middel en Kelin Bedrijf kendenan a ricibi Afl.4000 pa kwartal y esaki a suma 24 miyon. Lokual ta FASE actualmente averahe di 4000 hende ta cobrando esaki ainda cual a alkansa un suma di Afl.35 miyon di mei te cu november. Esaki ta inversionnan cu gobierno a hasi den e ser humano directamente pa hunto nos por traspasa e periode dificil aki y sali di Covid 19.
Parlamentario Endy Croes hunto cu Fraccion di MEP a pidi pa extende:
Un carta a sali recien pa Conseho di Minister cu e peticion oficial pa extende e ayudonan tanto di Loonsubsidie, MKB y FASE por lo menos pa e promer kwartal di 2021 y cu miras si mester rek esaki te juni 2021pa nos tin espacio pa hasi esaki. Den cuadro di recuperacion di nos economia e ayudonan aki ta nesesario. Parlamentario Endy Croes y Fraccion di MEP a hasi e solicitud pa inclui esaki den presupuesto 2021 y asina trese trankilidad pa mas di 21000 mama y tata di famia cu ta bibando cu un precupacion enorme kiko ta speranando nan desde Januari 2021. Pa tur klaridad Fraccion di MEP ta para fuerte tras di esaki y lo aproba un presupuesto cu tin esakinan aloka den dije. Ser humano ta keda central y hunto nos lo sali afor.
