ORANJESTAD, Aruba
E condicionnan cu Hulanda ta pone ta aumenta desigualdad den Reino
Parlamentario Endy Croes ta splika cu Defensornan di Pueblo ( Ombudsmannen) di Reinier van Zutphen di Hulanda, Keursly Concincion di Curacao y Gwendolien Mossel di St Maarten hunto a skirbi un carta recientemente pa Promer Minister Hulandes esta Mark Rutte. Den e carta aki nan a remarka nan precupacion con Aruba, Curacao y St Maarten ta wordo trata primordialmente basa na e condicionan cu Hulanda ta pone pa presta e paisnan den Reino plaka cual ta aumenta e desigualdad socio ecomomico den Reino y no ta sirbi e democracia di e paisnan.
/// Paisnan den Reino ta sufriendo:
Paisnan den Reino tin diferente reto y problema cual no ta caba solamente na nan frontera. Pobresa cu ta bisto na Bes eilanden (Caribisch Nederland) tambe ta semi notable na e otro paisnan den Reino. Corona virus a percura pa esaki bira mas conmovedor. E condicionan cu Hulanda a pone pa Paisnan den Reino ricibi Liquiditeits steun como prestamo entre otro baha personeel di e aparatonan lo garantisa mas sufrimento di acuerdo cu Defensornan di Pueblo. Nan no ta kere cu esaki lo por ta e intension real di Gobierno di Reino y no ta sirbi e democracia di e Paisnan.
/// Otro Problemanan cu Defensornan di Pueblo a nombra:
Den mesun carta cu e Defensornan di Pueblo hunto a manda pa Rutte nan a pidi atencion pa e falta enefectivo con Hulanda a atende cu situacion pa cu e recuperacion di St Maarten despues di e dañonan devastador cu horcan Irma a laga atras. Pa Curacao por ehempel aceso na awa portabel pa cuidadanonan vunerabel ta otro topico di importancia. Ademas refugiadonan di Venezuela tanto na Aruba ,Curacao y St Maarten ta un problema adicional. Falta di regulacionnan den combinacion cu lugarnan adecuado pa e refugiadonan por permanase ta otro problema cu na varios ocasion a wordo menciona.
/// Desigualdadnan:
Aruba sinembargo no tin su Defensor di Pueblo (ombudsman) ainda. E ley ta kla y den e lunanan nos dilanti esaki lo wordo trata y ohala promer cu aña sera Aruba por tin su Defensor di Pueblo inplace. E 3 Defensornan di Pueblo di Hulanda, Curacao y St Maarten a termina splikando cu nan lo pidi un reunion cu Rutte pa asina papia riba e desigualdadnan den Reino. Parlamentario Croes ta termina bisando den e corona crisis no ta e momento adecua pa trese cambionan grandi den Statuut y forsa e islanan cu ta hopi gevoelig riba e tema aki den un direcion cu lo trese hopi agitacion y instabilidad den comunidad a cambio di plaka. Ban spera Hulanda recapacita.