Parlamentario Endy Croes a duna un breve relato riba un Openbare Bijeenkomst cual a tuma lugar dialuna merdia den sala principal di Parlamento cual a inicia di 2pm y a termina te rond 8or anochi. Tanto Minister Danqui Oduber hunto cu Minister Presidente Evelyn Wever Croes hunto cu Crisis Team, KorpsChef Vanessa Tjon, Onderinspecteur Maureen Dirksz , Hefe di DBZ (DVG) Sharline Koolman, Dr Van Trigt di HAVA, Sr Rino Hermans y Rene Ridderstap di BRA, Ronella Tjin Asjoe Croes CEO di ATA , Epidemioloog Garreth Tromp y Bert Rodenburg Internist- Infectioloog di Hospital tabata entre otro e delegacion grandi cu tabata presente na Staten pa por a brinda un presentacion ny update amplio di Covid 19.
/// Casonan activo a baha di 1600 pa 800 caso activo:
Danki na e disciplina cu comunidad a cuminsa manifesta y alavez e equipo cu nos tin como frontliners riba tereno di cuido y mantencion di orden publico y alaves e Crisis Team di pais Aruba a juda nos bringa e virus aki unda e resultadonan a cuminsa duna indicasion cu nos ta bou control bek. Na inicio di september tabata tin 1200 caso activo cual a aumenta medio september na 1600 caso activo y jegando fin di september nos tin 800 caso activo. Berdad a tuma medidanan mas fuerte cual a causa precupacion of hasta kisas desgusto den cierto sectornan economico. Algun a sufri mas dolor cu otro momento a amplia toque de queda y introduci uso obligatorio di tapa boca den lugarnan sera. Medidanan tabata nesesario y ta pa purba frena y controla Covid 19 mas rapido y esaki awe den un siman di tempo ta dunando su frutonan unda nos a jega 800 caso activo y un rebaho di 50%.
/// Aruba por maneha 30 caso nobo pa dia cu tur trankilidad:
Minister Danqui a splika cu expertonan a conclui cu Aruba lo por atende cu 30 caso positivo pa dia na un manera safe y responsabel. No obstante cu Aruba tin 60 cama na hospital pa covid y 33 Intensive Care Unit Aruba ta buskando extra personeel pa Hospital den un combenio cu Hulanda. Casonan nobo pa dia ainda ta kedando poko halto aunke nan a baha considerablemente como cu tabata tin dia nan a piek den september na 139 y 179 caso positivo den un dia y awor ta rond 50 pa dia. Meta ta pa sigui baha esaki y alkansa 30 of menos pa dia di cual segun expertonan ta un cifra corecto cu Aruba por maneha y biba cune. Cu disciplina propio di nos concuidadanonan manteniendo nos mes na protocolnan establesi nos lo jega e meta tempran den October pa asina cuminsa poko poko lanta e medidadnan pa nos por continua cu nos bida cu e standardnan di un normal nobo Croes a termina splikando.
