Michael lampe cu 120 votos a drenta Parlamento lugar di Mike Eman
Parlamentario Endy Croes ta babuca con Mike Eman kier cuminsa campaña aunke mester bisa na un manera “machica machica” pero sin pidi su votadornan un disculpa. Mike Eman despues di elecion na september 2017 a tuma su decision di retira como Lider di AVP y alavez no tabata interesa pa forma un gobierno. Ta Mike Eman mes a bisa esaki den un entrevista e anochi di elecion momento el a confronta su mes cu realidad amargo cu AVP a bay atras cu 10 mil votos. Pueblo a rechasa e maneho coruptivo di AVP y a castiga Mike Eman. Momento cu tur su votadornan a pensa cu Mike Eman lo drenta Parlamento como nan representante digno, Mike Eman a bolbe dal su votadornan un cara abou y un baño di awa friu. Mike Eman na un manera “sin aprecio” pa su votadornan a rechasa tur sostenedornan di AVP cu e actirud aki. Mike Eman a dicidi cu e ta escoge pa tuma su “overbruggingstoelage” y asina keda sin drenta Parlamento pero keda cobra salaris di x ministerpresident for di cas bibando dushi den su Penthouse den Marisol building. No tin palabra pa discribi esaki.
Mike Eman a laga Michael Lampe cu 120 votos represente:
Momento cu Mike Eman a wordo pidi pa asumi su responsabilidad y drenta Parlamento pa sirbi su pueblo Mike a dicidi otro. Mike Eman a “nenga” di drenta como miembro di Parlamento. Ora un candidato cu bay elecion wordo escogi pa pueblo e mester asumi su responsbilidad. Mike Eman a saca su mes cu votonan preferencial y esaki ta hasi e hecho aki mas repudiabel. Conforme nos systema electoral Mike Eman mester a nenga “schriftelijk” firmando cu e ta distancia di e posicion di “HONOR” como Parlamentario pa asina un otro persona mas patras riba e lista di AVP haña e oportunidad. Micheal Lampe cu apenas 120 votos a gana Lotto. Michel Lampe a drenta Parlamento momento Mike Eman a nenga di representa su votadornan y AVP. Kiko ta e resultado di e performance di Micheal Lampe? Nada di compara. Un politico di panlefi. Un politico cu casi nunca ta na trabou. Un politico floho. Un politico cu ainda no ta compronde su rol den politica. Un politico kende ta mas ocupa cu musica ( cual ta algo bunita porcierto) enbes di ta traha pa comunidad y representa e mas di 7000 votadornan di Mike Eman. Pa algun di e rasonnan aki masha hopi votador di AVP ta hopi rabia. Mesun systema tanto Jennifer Arends y Marlon “telraam”Sneek a drenta. Pues momento Doctor Schwengle y Richard Visser tambe a nenga a habri porta pa e dosnan aki bin cologa na rabo. Mike Eman no a pidi nunka un disculpa oficial. Awor e votadornan kiermen cu ta hopi laat. Mike Eman a menosprecia nan confiansa door di pidi nan vota pa su persona y AVP y despues bira lomba y keda sin representa nan. Varios cu nos por a combersa cu nan a splica nos cu Mike Eman debenan publicamente un disculpa. Alavez den mesun rosea ta pidi pa Mike Eman baha na awa. E aña aki nan lo duna MEP e sosten di confiansa paso nan por a nota e diferencia grandi entre “showman y show boat” y personanan cu ta traha cu alma y cuerpo pa nan pais manera varios politiconan di MEP. Parlamentario Croes ta termina splicando cu ta su deber pa raporta locual pueblo ta vocifera.
