ORANJESTAD,Aruba
Parlamentario Endy Croes a scucha e poltico di “Panlefi” Michael Lampe despues di un reunion den Parlamento diabierna ultimo den prensa. Parlamento unanimamente a aproba e Ley unda (21) Parlamentarionan lo entrega 25% di nan salaris pa asina demostra solaridad pa cu pueblo primordialmente esnan cu a perde trabou durante e crisis aki. E plaka aki lo bay den un fondo pa sostene entre otro e projecto di FASE. Tanto Rocco Tjon Lider di Fraccion di MEP y Ricardo Croes Lider di Fraccion di RED esnan cu a entrega e Ley aki oficialmente fin di maart 2020 mester a defende e Ley cu nan a presenta. Ta trata di un ley di iniciativa y ambos Lider di Fraccion mester a sinta den e stoelnan diferente e biaha aki esta e stoelnan unda normalmente ministernan ta sinta pa asina defende e ley di iniciativa. Rocco Tjon a duna amplio splikacion riba e pensamento y principio di e ley aki desde inicio cu e ley aki a wordo entrega te awor cu el a wordo trata oficialmente den Parlamento. E boluntad di solaridad a wordo demostra desde fin di maart cu a entrega e ley di iniciativa aki.
/// Inicialmente calculacionnan pa cu e ley tabata 18.6%:
Inicialmente dia cu a entrega e ley esaki tabata basa riba calculacionnan cu Parlamentarionan lo entrega 18.6% di nan salaris. A splika cu aki a demostra e boluntad di Parlamento pa entrega como muestra di solidarismo. Primordialmente esaki a tuma lugar algun dia despues cu Parlamento a aproba e presupuesto di gobierno cu un deficit di 1300 miyon pa cu aña 2020. Durante tratamento di e presupuesto 2020 hunto cu rapportnan di Banco Central y Economische Zaken por a conclui cu e crisis y chaos cu corona virus lo ocasiona ta bay ta giganteso. Mesun siman a sinta cu Minister di Finansas y basa riba e promer calculacionnan a yega na e cifra pa corta 18.6% di salaris di Parlamentarionan y a adapta e ley comotal y a entrega esaki e siman siguiente.
/// Enbista cu e golpi ta mucho mas grandi cu a anticipa a aproba 25%:
Diabierna ultimo Parlamento a trata e ley di iniciativa presenta pa Fraccion di MEP y RED y hunto a presenta un nota di cambio pa aumenta e 18.6% inicial pa 25%. Esaki a haña sosten di tur Fraccion y 21 Parlamentario a sostene esaki. Despues cu a sinta cu sindicatonan Parlamento semper a expresa cu ta habri pa entrega mas. Alaves momento cu a haña cifras adicional di e enbergadura di e daño material cu corona virus lo trese cune a sinti e deber pa pone mas plaka disponibel di nan propio salaris pa sostene entre otro e projecto di FASE pa mas hende por ricibi e ayudo di Afl.950 florin. Diabierna ultimo Parlamento unanimamente a sostene e Ley di iniciativa aki pa asina desde fin di Mei Parlamentarionan cuminsa entrega. Pesey no por compronde e politica barata di Micheal Lampe y Fraccion di AVP cu kier hasi comosifuera nan a bin cu e Ley aki. Berdad ta cu Fraccion di MEP y RED a entrega e Ley aki como un ley di iniciativa fin di maart. Berdad tambe ta cu Fraccion di MEP y RED a bin cu e nota di cambio di 18.6 pa 25%. Berdad tambe ta cu tur Fraccion y 21 Parlamentario a sostene e ley aki. Enrealidad no ta importa tampoko ken a bin cu e ley pero importante ta cu e Ley aki a wordo sosteni pa henter Parlamento y cu e ayudo lo jega na FASE pa finalmente e 37000 mama y tatanan di famia cu a perde trabou hanja un ajudo. Esaki ta e muestra di solidarismo. Kiko exactamente Micheal Lampe no ta compronde of ta cual reunion Micheal Lampe a atende diabierna ultimo ta keda un misterio pa Parlamentario Endy Croes. Micheal Lampe sinonimo na un Politico di Panlefi!
