Parlamentario Endy Croes ta haña masha frapante cu algun Parlamentario cu casi nunka ta atende trabou ta esnan cu ta vocifera cu nan tin solucion pa Aruba
Micheal Lampe 7 luna y 29 dia sin bin trabou den 2020:
Por a tuma nota cu Micheal Lampe Parlamentario di AVP recientemente a manera cuminsa rebiba su vos den 2021. Nos ta lamenta masha hopi cu Michel Lampe ta un di e Parlamentarionan cu a cobra masha hopi plaka sin yega trabou. Den nos Constitucion ( Staatsregeling) tin ancra na artikel III.6 lid 3 cu un Parlamentario cu permanese 8 luna of mas den exterior automaticamente lo perde su titulo como Parlamentario. Pues lo perde trabou. Den caso di Micheal Lampe el a keda 7 luna y 29 dia sin presenta na trabou. Friamente calculado! Net Lampe kier splika awor cu gobierno no tin un plan concreto pa economia? Net Lampe kier papia di hopi famia cu ta pasando den duro. Micheal Lampe dia 24 di Maart su ultimo reunion cu el a atende durante henter aña 2020 a vota contra presupuesto 2020 y pues contra e ayudo cu gobierno a presupuesta directamente pa e ser humano. Un total di 339 miyon a wordo inverti den Loonsubsidie, FASE y MKB. Un total di 33 mil persina ta ricibiendo sosten na cuminda. Lampe a cobra 80 mil den 2020 sin a presenta na trabou y a vota contra e ayudo pa pueblo. Eerlijk lo ta pa debolbe Parlamento sikiera mitar di e suma aki bek.
Benny Sevinger tambe cobrando sin traha:
Benny Sevinger un acusado y sospechoso primordial di husticia den caso Avestruz tambe ta cobrando sin traha. Cifras ta ilustra cu Benny no a atende ningun reunion di comision fijo, ningun Openbare Bijeenkomst, ningun Besloten vergadering, ningun Hoorzitting, y ningun reunion di Comision Central durante 2020. Pues 0 reunion. Algun reunion Publico Benny a aparese solamente pa firma y bay bek cas. Benny no ta bin trabou. Benny a cobra 120 mil florin durante henter aña 2020. Tristo con un acusado y sospechoso mayor di husticia den caso di corupcion di tereno manera Benny ta keda causa daño na imagen di Parlamento burlando di nos leynan existente. Nos por corda con Benny a grita na Januari 2018 den Parlamento “I dont give a damn”.
Daphne Lejuez a horta un asiento y no ta jega trabou:
Daphne Lejuez ta otro Parlamentario abusador. Nan ta abusa di plaka di pueblo y ta sconde tras di un ley anticua cual mester wordo revisa. Asina Daphne Lejuez cu a haña un lift riba partido MEP pa asina profila su mes y atraves di e vehiculo MEP el a logra drenta Parlamento cu apenas 100 votos a traciona su partido. No solamente a traciona MEP pero a kibra tur promesanan hasi cu partido cu nunka lo “horta” of bay cu asiento cu eticamente no ta di Bo pero di partido. Ta partido a cana, traha y soda pa jega na e asientonan como team colectivo. Daphne a dicidi mei mei di e problema di Serlimar pa rasonnan hopi personal pa un compania di su casa no perde contract pa e bula cura y “horta” asiento di MEP y bira un Fraccion nobo di un persona independiente. Lokual a resalta desde e momentonan ey Daphne a cuminsa bay school y ta bishita Universidad di Aruba studiando Ley fulltime. Pues awor Daphne ta cobra 100% di salaris di pueblo na Parlamento, no ta acudi na practikamente ningun reunion, no ta duna ningun balor agrega como sirbidor di pueblo y ta studiando ley riba lomba di e pueblo aki. Bo ta kere mañan ora e keda kla como jurista e lo trata un caso pornada pa Bo pueblo? Esaki ta tipifica mente di un abusador. Probechador di cos di otro. Ta cobra sin traha y keda hari cu tur hende manera nada a pasa. Parlamento mester cambia ley pronto pa nunka mas cosnan asina por tuma lugar unda ta permiti buladornan di cura horta asiento bay cune sigui cobra sin traha na bienestar di pais Aruba. Lamentablemente tin biaha mester corda e dicho “ Burico ta traha pa cabay come”.
