Parlamentario Endy Croes ta splika cu a reuni cu zorgenstelsel den Parlamento diahuebs ultimo den un Vaste Commissie vergadering. Lamentablemente lokual wordo discuti den un Vaste Commissie vergadering no ta publico y no lo por elabora riba detayes na e momentonan aki.
Zorgenstelsel ta hopi precupa cu e medidanan di Hulanda:
Representantenan di mayoria dunadornan di cuido tabata presente y a expresa nan inquitud profundo contra Raymond Knops kende a exigi pa corta 5 miyon pa luna esta 60 miyon florin den cuido den 2021. Tur hende ta di acuerdo cu cos no ta manera antes mas y mester ahusta na e normal nobo. Mayoria negoshi mester a cambia nan modelo di hasi negoshi y den cuido esaki no lo ta diferente. Pues algo positivo ta cu tur hende ta compronde cu mester bin cu ahustacion y baha gasto. E manera kisas cu Hulanda ta pusha pa esaki ta e precupacion. Parlamento a expresa su mes den unanimidad cu nan no ta di acuerdo cu e 5 miyon pusha sin argumentacion. Alaves Parlamento ta di acuerdo si cu mester corta den gastonan di AZV y aki ta unda nos mester buska pa hanja otro. Zorgenstelsel a manda un carta tanto pa Ministerraad y Parlamento fecha 12 di Januari 2021 cu tur nan precupacionan. E carta aki ta firma pa Raad van Bestuur Hospital, Instituto Medico San Nicolas, Respaldo, SABA(Stichting Algemene Bejaardenzorg Aruba, HAVA ( Huisartsenvereniging), AVF(Arubaanse Vereniging Fysiotherapueten), VMSA ( Vereniging Medisch Specialisten Aruba, BVA( Botica’s Vereniging Aruba), ASHA(Vereniging van Specialisten ziekenhuis Aruba), ADS( Aruba Dental Society), VVA( Vereniging Verloskundigen Aruba), VAA( Vereniging Apothekers Aruba), AVSD(Vereniging Specialisten in loondienst), ABV( Arubaanse Bond voor Verpleegkundigen), LDS( Laboratoruim di Servicio NV. Pues por mira e union grandi den e cadena cu ta duna cuido na Aruba. Esaki tambe ta ilustra algo historico den e aspecto aki. Covid 19 a trese nos tur na mesa pa uni y sali cu un mihor solucion piosibel. Pues ta e momento oportuno pa nos tur pone nanishinan den mesun direcion pa nos por logra e meta final esta reducion di gastonan den cuido y hasi esaki sostenibel pa e proximo 10 a 15 añanan sin mester mishi e calidad di cuido. Parlamentario Endy Croes a splika cu Fracion di MEP a saca un carta ayera mesora pa Minister Danqui Oduber cu e solicitud pa para e medidanan cu Hulanda ta forsando Aruba introduci desde 1 di februari 2021. Alaves PFraccion di MEP a pidi pa forma un plataforma di tur stakeholders den union pa hunto den 60 dia bin cu alternativanan balansa unda tur hende lo bay coopera den un paketa cu ta carga sosten di henter pueblo. Boluntad ta mustra cu e tey y ban spera cu Hulanda ta di acuerdo pa brinda e espacio nesesario. Hunto nos por logra un mihor producto causando menos dolor na henter comunidad. Fraccion di MEP ta keda pendiente un contesta di Minister alrespecto nan solicitud akiriba menciona.
